Imitwe yitwaje intwaro yo mu Ihuriro Wazalendo rishyigikiwe n’ubutegetsi bwa Repubulika Iharanira Demokarasi ya Congo ihanganiye kugenzura agace ka Batakirwa gaherereye muri gurupoma ya Bafuna, Teritwari ya Walikale.

Imitwe ihanganye ni NDC-R iyoborwa na Guidon Shimiray Mwissa uyobora Wazalendo ku rwego rwa gisirikare mu Ntara ya Kivu y’Amajyaruguru na Uhuru-RDC iyoborwa na Mashite Kashira.

Tariki ya 11 Gashyantare 2026, Mashite yohereje abarwanyi be mu midugudu itatu yo muri Bakakirwa ikungahaye ku mabuye y’agaciro, imenyesha NDC-R ko niramuka ihohereje abayo, impande zombi zigomba guhangana.

Umuyobozi wa Batakirwa witwa Kibaki yatangaje ko abarwanyi ba Uhuru-RDC bamaze iminsi batera ubwoba abaturage, babashinja gushyigikira NDC-R. Yasobanuye ko kubera guterwa ubwoba, yafashe icyemezo cyo guhungira mu Mujyi wa Walikale.

Kibaki yatangarije ikinyamakuru Actualite ati “Abaturage bari mu byago bikomeye. Abitwaje intwaro batera ubwoba abasivili, babasanisha n’abanzi babo.”

Uyu muyobozi yasabye Leta ya RDC gukiranura iyi mitwe isanzwe yifatanya mu kurwanya ihuriro AFC/M23, agaragaza ko bitabaye ibyo, ikibazo gishobora gukomera kurushaho.