Perezida wa Ukraine Volodymyr Zelensky yatangaje kuri uyu wa kane ko abantu umunani, barimo n’umwana, biciwe mu murwa mukuru Kyiv, mu gitero gikomeye cy’Uburusiya cyabaye mu ijoro ryacyeye.

Minisitiri w’ubutegetsi bw’igihugu Ihor Klymenko yatangaje ku rubuga nkoranyambaga rwa Telegram ko abapfuye barimo abana babiri, mu gihe umukuru w’umujyi wa Kyiv Vitali Klitschko yavuze ko abantu nibura 38 bakomerekeye muri icyo gitero "kinini" cy’indege nto z’intambara zitajyamo umupilote (drone) n’ibisasu bya misile.

Mu itangazo ku rubuga nkoranyambaga rwa X, Zelensky yavuze ko ibiro bya perezida w’Uburusiya (Kremlin) byahisemo misile za "balisitike aho kujya ku meza y’ibiganiro", ashimangira ko bicyenewe ko Uburusiya bufatirwa "ibindi bihano bikaze".

Ibyo bisasu bya misile birashwe nyuma yuko ingo zirenga 100,000 zo muri Ukraine zibuze umuriro w’amashanyarazi kubera ibitero byaherukaga kuba bya ’drone’ Uburusiya bwagabye ku bikorwa-remezo by’amashanyarazi ku wa gatatu.
Mu butumwa bwo ku rubuga nkoranyambaga rwa Telegram, Tymur Tkachenko, umukuru w’ibikorwa bya gisirikare muri Kyiv, yavuze ko umwe mu bana bishwe yari umukobwa w’imyaka 14. Abana nibura batanu bari bakomerekeye mu bitero bya ’drone’ biheruka.