Igisirikare muri Mali cyongeye guhirika ubutegetsi aho bivugwa ko abasirikare bakomeye bafunze uwari Perezida w’inzibacyuho Bah Ndaw na Minisitiri w’intebe n’uwingabo kuri uyu wa mbere mu rwego rwo kubahindura.

Reuters ivuga ko Abadipolomate nabo muri Guverinoma batangaza ko Perezida Bah Ndaw, Minisitiri w’intebe, Moctar Ouane na Minisitiri w’ingabo, Souleymane Doucoure, batwawe ku kigo cya gisirikare ahitwa Kati hanze y’umujyi wa Bamako.

Uku gufunga aba bayobozi b’inzibacyuho kwatumye benshi bibaza kuri iki gihugu cyo mu Burengerazuba bwa Afurika cyane ko muri Kanama umwaka ushize aribwo Perezida Ibrahim Boubacar Keita yahiritswe ku butegetsi n’igisirikare.

Perezida Ndaw na Ouane bari bahawe inshingano zo kuyobora umuhango wo guhana ubutegetsi hagati y’abasirikare n’abasivile mu mezi 18 ariko bahiritswe batarabikora.

Uku gufungwa kubaye nyuma y’itangazo ry’impinduka muri Guverinoma aho abasirikare 2 bagize uruhare mu guhirika perezida Keita bari bamaze gukurwa mu buyobozi.