Kuri iki Cyumweru, itariki ya 13 Kanama, Perezida William Ruto wa Kenya yakoreye uruzinduko muri Uganda kugira ngo agirane ibiganiro na mugenzi we, Yoweri Museveni, ariko igihe yahisemo cyateje kwibaza byinshi.

Iyi nama yo ku rwego rwo hejuru yabaye nyuma y’icyumweru kimwe gusa Uhuru Kenyatta wahoze ari Perezida wa Kenya agiye muri Uganda ku itariki ya 6 Kanama 2023.

Perezida Ruto yerekeje muri Uganda nyuma ya saa sita nyuma yo kuva gusenga mu itorerero risengera ahitwa Karen.

Ibiganiro hagati y’abayobozi bombi byabereye mu muhezo, byibanze ku gushimangira umubano w’ibihugu byombi hagati ya Kenya na Uganda, ndetse no gukemura ibibazo by’akarere bifitemo inyungu.

Ati: “Kenya na Uganda bifite ubufatanye buhamye bushingiye ku myaka ibarirwa muri za mirongo y’ubuvandimwe bwa Afurika y’Iburasirazuba, ubufatanye bukomeye, ndetse n’ubufatanye buhoraho.

Mu butumwa yanditse ku mbuga nkoranyambaga, Perezida Ruto yagize ati: "Nagiranye ibiganiro na Perezida Kaguta Museveni ku bibazo by’inyungu duhuriyeho, cyane cyane ubucuruzi, umutekano n’ubuhinzi."

Ku ruhande rwe, Perezida Museveni yavuze ko abo bayobozi bombi baganiriye ku “bibazo by’ibihugu byombi ndetse n’akarere ”.

Igihe cy’uruzinduko rwa Perezida Ruto, nyuma gato yo guhura kwa Museveni n’uwahoze ari Perezida, Kenyatta, ariko, cyateje impaka mu bahanga mu bya politiki.

Ababikurikiranira hafi bavuga ko izi nama zishobora nanone kuba zaraganiriwemo uko politiki yifashe muri Kenya, aho Perezida Ruto na Kenyatta wamubanjirije bakomeje kutumva ibintu kimwe no guterana amagambo kwa hato na hato.

Ku ruhande rwe, Perezida Museveni yatangaje ko Uhuru yamusuye nk’umuhuza mu bibazo byo muri Repubulika ya Demokarasi ya Congo.