Mu gihugu cy’u Burundi by’umwihariko mu Mujyi wa Bujumbura , haravugwa amakuru y’uko inzego z’Umutekano zikomeje guhiga Abanyarwanda ndetse n’abavuga ururimi rushamikiye ku Kinyarwanda.

Sponsored Ad

Guhiga abanyarwanda byari biherutse gukorwa mu minsi yashize ubwo iki gihugu cyafungaga imipaka igihuza n’u Rwanda, ariko kuri ubu byongeye gufata indi ntera aho muri iki Cyumweru noneho umukwabu wakozwe warebaga n’abandi bavuga ururimi rushamikiye ku Kinyarwanda.

Amakuru avuga ko abatuye mu bice byo muri zone ya Rukaramu, Komine Mutimbuzi, mu Ntara ya Bujumbura, ahazwi cyane kw’izina rya Bujumbura-Rural, aribo bibasiwe ndetse bakanafungirwa ahantu hatazwi.

Amakuru ikinyamakuru Umuryango gikesha Umwe mu Banyarwanda bari mu Burundi nawe yaduhamirije aya makuru, yemeza ko ubu kuva mu rugo ari ukwigengesera kuko abakoresha Ikinyarwanda batorohewe kuri ubu. bamwe bahisemo kutongera kugikoresha nk’uko akomeza abivuga.

Ati" Baraza munzu bagasaka basanga ubuga Ikinyarwanda bagahita bagusohora, bakagupakira mu ma Bus bakubwira ngo subira iwanyu. icyakora icyo tutaramenya n’uko utamenya niba koko babohereza mu Rwanda cyangwa babafunga?"

SOS Media Burundi, ivuga ko Abanyekongo bavuga ururimi rw’ikinyamulenge gifitanye isano rya hafi n’ikinyarwanda, bagiye bafatwa bigizwemo uruhare n’umupolisi uri mu rwego rwa Coloneri.

Guhiga bukware Abanyarwanda baba mu Burundi , byatangiye ubwo iki gihugu cyari kimaze gufata umwanzuro wo gufunga imipaka igihuza n’u Rwanda.