Ambasaderi wa Repubulika Iharanira Demokarasi ya Congo mu Burundi, Willy Mulumba ndetse n’abandi bakozi babiri bo muri Ambasade y’iki gihugu i Bujumbura bakekwaho gukorana n’Ihuriro AFC rifite umutwe witwaje intwaro wa M23 na MRDP - Twirwaneho.

Mu gitondo cya tariki ya 27 Nyakanga, inzego z’umutekano zataye muri yombi umukozi w’iyi Ambasade, Laurent Ruboneka Musabwa, unasanzwe ari Umuyobozi w’Abanyamulenge barokotse igitero cyagabwe mu Nkambi ya Gatumba mu 2004.

Mu ijoro rya tariki ya 28 Nyakanga, undi mukozi wa Ambasade y’u Burundi witwa Félix Mweza na we yatawe muri yombi n’inzego z’umutekano z’u Burundi. Uyu akomoka mu bwoko bw’Abashi muri Kivu y’Amajyepfo.

Musabwa na Mweza bajyanywe bwangu i Kinshasa mu ndege yakodeshejwe na Leta ya RDC. Bafunzwe n’abakozi b’Urwego rushinzwe Iperereza mu Rwego rwa Gisivili (ANR) n’urwa gisirikare (DEMIAP), mu gihe bari mu ibazwa.

Tariki ya 30 Nyakanga, Ambasaderi Mulumba na we yahamagajwe i Kinshasa kugira ngo atange ibisobanuro kuri aba bakozi ba Ambasade ya RDC bakekwaho gukorana na AFC.

Amakuru avuga ko nyuma yo gutanga ibisobanuro, Ambasaderi Mulumba yashatse gusubira mu kazi i Bujumbura, ariko Leta ya RDC irabyanga, imusaba kuguma i Kinshasa mu gihe iperereza rikomeje.

Ntacyo Leta ya RDC iravuga ku cyemezo cyo guhamagaza Ambasaderi Mulumba, gusa bivugwa ko na we ari mu bakurikiranyweho gukorana na AFC.