Alain Guillaume Bunyoni wigeze kuba Minisitiri w’Intebe w’u Burundi yagejejwe imbere y’urukiko kuri uyu wa Mbere aho mu byo yashinjwe harimo gusuzugura inzego zishinzwe umutekano no gutuka Perezida.

Sponsored Ad

Bunyoni yabaye Minisiti w’Intebe kuva mu 2020 kugeza muri Nzeri 2022 ariko aza kwirukanwa nyuma y’aho Perezida Evariste Ndayishimiye agereye ku butegetsi.

Uyu mugabo wanabaye Umuyobozi wa Polisi na Minisitiri w’Umutekano yasimbuwe na Gervais Ndirakobuca iminsi mike nyuma y’aho Ndayishimiye agaragaje ko yashatse kumuhirika ku butegetsi.

Yatawe muri yombi mu kwezi gushize mu Mujyi wa Bujumbura mbere y’uko yizihiza isabukuru ye y’imyaka 51 y’amavuko.

Mu iburanisha ryo kuri uyu wa Mbere yongerewe igihe cyo gufungwa by’agateganyo muri Gereza ya Ngozi ihereye mu Majyaruguru y’igihugu nk’uko amakuru AFP yahawe n’abo mu nzego z’ubutabera abivuga.

Iri buranisha ryayobowe n’abacamanza batatu bo mu rukiko rukuru rubera mu muhezo nk’uko inkuru ya The East African ibivuga.

Bunyoni ashinjwa gutesha agaciro inzego z’umutekano, ibyaha bibangamiye ubukungu bw’igihugu no kwikungahaza binyuranyije n’amategeko. Ashinjwa kandi gutunga intwaro mu buryo bunyuranyije n’amategeko no gutuka perezida.

Bunyoni yahoze ari inshuti magara ya Pierre Nkurunziza wahoze ari perezida akaba n’igihangange mu ishyaka riri ku butegetsi, CNDD-FDD.