Leta ya Caméroun yaciye kuganira ku buzima bwa Perezida Paul Biya w’iki gihugu, mu gihe ibihuha bivuga ku buzima bw’uyu mukambwe bikomeje kuba byinshi.

Sponsored Ad

Kuva mu ntangiriro z’iki cyumweru ku mbuga nkoranyambaga hakwirakwiye inkuru z’uko Perezida Biya yaba atakiriho.

Guverinoma ya Caméroun mu itangazo yasohoye yavuze ko Perezida Biya w’imyaka 91 y’amavuko ari mu bitaro, ariko ko ameze neza.

Minisiteri y’Umutekano w’Imbere muri Caméroun mu ibaruwa yandikiye ba Guverineri b’intara zo muri iki gihugu, yavuze ko kuganira ku buzima bwa Perezida Biya ari ikibazo kireba igihugu.

Minisitiri w’agateganyo Paul Atanga, yabwiye ba Guverineri ati: "Guhera uyu munsi, ikiganirompaka cyose mu binyamakuru kivuga ku buzima bwa Perezida kirabujijwe cyane. Abazabirengaho bazahura n’imbaraga z’amategeko".

Ba Guverineri bose bo muri Caméroun basabwe gushyiraho amatsinda y’abashinzwe gukurikirana abazarenga ku mabwiriza yashyizweho, haba ku mbuga nkoranyambaga ndetse no mu bitangazamakuru.