Perezida Denis Sassou Nguesso yongeye gutorerwa gutegeka Congo-Brazzaville ku bwiganze bw’amajwi 89%, nkuko byatangajwe na minisitiri w’ubutegetsi bw’igihugu.

Uwari umukandida ukomeye mu batavuga rumwe n’ubutegetsi Guy Brice Parfait Kolélas, wapfuye ku cyumweru, yagize amajwi 8%. Yari arwaye Covid-19.

Perezida Sassou Nguesso, w’imyaka 77, amaze imyaka 37 ku butegetsi.

Perezida Denis Sassou Nguesso yahatanaga n’abandi bantu barimo uwahoze ari minisitiri w’imari Mathias Dzon, na Guy Brice Parfait Kolélas, umuhungu w’uwahoze ari minisitiri w’intebe wahitanwe na Covid-19 mu minsi mike ishize.

Sassou Nguesso w’imyaka 77 yatorewe gutegeka kuri manda ya kane.

Mu 2015, itora rya kamarampaka ryahinduye itegekoshinga rivanaho ingingo y’imyaka ntarengwa y’umukuru w’igihugu.

Sassou Nguesso aheruka gutsinda amatora ya 2016, amatora yavuzwemo urugomo n’ubujura bw’amajwi.

Sassou Nguesso ni perezida wa gatatu muri Africa umaze igihe kirekire ku butegetsi (hafi imyaka 37), nyuma ya Paul Biya wa Cameroun na Teodoro Obiang Nguema wa Equatorial Guinea.

Ari ku butegetsi muri iki gihugu kuva mu 1979, uvanyemo imyaka itanu yabuvuyeho nyuma yo gutsindwa amatora mu 1992.

Mu 1997 yagarutse ku butegetsi nyuma y’intambara ngufi mu gihugu aho yari ashyigikiwe n’ingabo za Angola.

Sassou Nguesso yahoze ari koloneri mu ngabo, yatojwe n’Abafaransa mu gisirikare kirwanira mu kirere.

Ageze ku butegetsi bwa mbere mu 1979 - 1992 yahagaritse umubano na leta y’Abasoviyeti, aha ikaze kompanyi z’Abafaransa n’ibindi bihugu by’iburengerazuba mu bikorwa byo gucukura no gutunganya ibitoro muri Congo.

BBC