Ibiro bya perezida wa DR Congo bivuga ko habaye kwibeshya ku wasomye itangazo akitiranya umujenerali wapfuye cyera n’uwashyizwe mu mwanya, nk’uko ibinyamakuru byaho bibivuga.
Mu ijoro ryo kuwa mbere, kuri televiziyo ya leta, RTNC, hasomwe itangazo ry’ishyirwa mu myanya ry’abakuru b’uturere twa gisirikare twa DR Congo ryakozwe na Perezida Felix Tshisekedi.
Umunyamakuru wasomye itangazo yasomye General Floribert Kisembo Bahemuka na nimero ye ya gisirikare ko ashyinzwe akarere ka gisirikare ka (...)

Sponsored Ad

Ibiro bya perezida wa DR Congo bivuga ko habaye kwibeshya ku wasomye itangazo akitiranya umujenerali wapfuye cyera n’uwashyizwe mu mwanya, nk’uko ibinyamakuru byaho bibivuga.

Mu ijoro ryo kuwa mbere, kuri televiziyo ya leta, RTNC, hasomwe itangazo ry’ishyirwa mu myanya ry’abakuru b’uturere twa gisirikare twa DR Congo ryakozwe na Perezida Felix Tshisekedi.

Umunyamakuru wasomye itangazo yasomye General Floribert Kisembo Bahemuka na nimero ye ya gisirikare ko ashyinzwe akarere ka gisirikare ka Nord Equateur.

Ibi byagarutsweho n’abantu benshi ku mbuga nkoranyambaga kuko bizwi ko General Floribert Kisembo Bahemuka yapfuye arashwe mu 2011.

Umukozi mu biro bya perezida kuwa kabiri yabwiye BBC ko ibyabaye ari "ikosa ry’uwasomye amakuru" ariko ntiyatanga ibisobanuro.

None kuwa gatatu, ibinyamakuru muri DR Congo byavuze ko ushinzwe itumanaho mu biro bya perezida, Erik Nyindu, yatangaje ko habayeho “kwibeshya mu gusoma neza” izina.

Erik Nyindu asubirwamo n’ibinyamakuru agira ati: “Uwasomye gushyirwa mu myanya yasomye [izina] Kisembo mu mwanya wa Kisebwe.”

Gusa umunyamakuru wa RTNC wasomye itangazo yasomye ’Kisembo’.

Nyindu avuga ko uwashyizwe muri uwo mwanya ari Gen Kisebwe Lamuseni wahoze akuriye ingabo zirinda umukuru w’igihugu, ubu wari ukuriye akarere ka gisirikare ka Ituri na Haut-Uele.

Ibi ariko ntibyanyuze bamwe, ku mbuga nkoranyambaga bavuze ko izina Kisembo Bahemuka Floribert ryasomwe ritandukanye mu buryo busobanutse na Kisebwe Lamuseni. Ibisobanuro bamwe bafashe nko kwivana mu gisebo.

Gen Kisembo Bahemuka Floribert yishwe arashwe n’ingabo za DR Congo i Djugu muri Ituri mu 2011 nyuma y’uko bitangajwe ko yatorotse igisirikare, nk’uko byatangajwe na Radio Okapi ifashwa na ONU.

Izindi mpinduka zavuzwe muri iri tangazo

Mu bandi basirikare bahawe imyanya na Perezida Félix Tshisekedi mu itangazo ryo kuwa mbere harimo Brig Gen Sylvain Ekenge wagizwe umuvugizi w’igisirikare cya DR Congo.

Ekenge yari umuvugizi wa guverineri wa gisirikare w’intara ya Kivu ya Ruguru, yasimbuye Gen Maj Léon-Richard Kasonga Tshibangu we wagizwe komanda w’akarere ka gisiriakare ka gatatu [kagizwe n’intara za Maniema, Kivu zombi, Bas-Uélé, Tshopo, Haut-Uélé na Ituri].

Undi washyizwe mu mwanya ni John Tshibangu wahoze azwi ku ipeti rya Colonel, mu gihe cya vuba byavuzwe ko yagizwe Lieutenant General, ubu wahawe gutegeka akarere ka gisirikare ka 21 (Kasaï Oriental).

Gen Tshibangu, wahoze mu mutwe witwaga RCD/Goma akaza kujya mu ngabo za leta, mu 2011 yagaragaye ku mashusho avuga ko yashinze umutwe urwanya ubutegetsi bwa Joseph Kabila abushinja kwiba amajwi muri Kasaï Oriental yari ay’umukandida Étienne Tshisekedi.

Tshibangu yarahizwe arahunga aza gufatirwa muri Tanzania yohererezwa Kinshasa aburanishwa ku byaha byo ’gutoroka igisirikare no gushinga umutwe w’inyeshyamba’, ibyaha we yahakanye.

Ikinyamakuru MediaCongo kivuga ko yarekuwe ku mbabazi, ku butegetsi bwa Félix Tshisekedi, akazamurwa ipeti mugihe gishize, ubu akaba yahawe akarere ka gisirikare akuriye.

Mu byumweru bibiri bishize, Perezida Tshisekedi yashyizeho umugaba mukuru w’ingabo mushya, Lt Gen Christian Tshiwewe Songesha, naho uwo yasimbuye Gen Célestin Mbala Musense itangazo ryo kuwa mbere ryemeje ko agiye mu kiruhuko cy’izabukuru.

Ingabo za DR Congo zinengwa kunanirwa kurandura imitwe y’inyeshyamba yabujije amahoro uburasirazuba bw’iki gihugu.

BBC