Equatorial Guinea yatanze ikirego gishya irega Ubufaransa kubera gufatira inzu y’agaciro kanini n’indi mitungo, nk’uko bivugwa n’Urukiko mpuzamahanga mpanabyaha.

Sponsored Ad

Equatorial Guinea yatanze ikirego gishya irega Ubufaransa kubera gufatira inzu y’agaciro kanini n’indi mitungo, nk’uko bivugwa n’Urukiko mpuzamahanga mpanabyaha.

Iyo nzu iri i Paris yafashwe nyuma y’uko visi perezida w’icyo gihugu, Teodorin Nguema Obiang Mangue, yahamijwe icyaha cyo gusahura umutungo wa rubanda ashyira mu buzima bwe bw’agatangaza.

Obiang yahakanye ibyo yarezwe mu Bufaransa.

Equatorial Guinea yajuririye umwanzuro wo gufatira imitungo ye, ariko umwaka ushize urukiko mu Bufaransa rwagumijeho icyo cyemezo.

Obiang ni umuhungu wa Perezida Teodoro Obiang Nguema, perezida umaze imyaka myinshi ku butegetsi muri Africa.

Teodoro ari ku butegetsi muri iki gihugu gikungahaye ku bitoro kuva mu 1979 kandi mu 2012 yagize umuhungu we visi perezida.

Uyu visi perezida w’imyaka 54, yakunze kunengwa mu binyamakuru mpuzamahanga ubuzima bwo kubaho mu buryo buhenze bikomeye mu umubare munini mu gihugu ari uw’abari munsi y’umurongo w’ubukene.

Hagati ya 2000 na 2011, Obiang yaguze imitungo itandukanye mu Bufaransa, irimo inzu yo mu bwoko bwa ‘mansion’ iri mu gace kazwi cyane k’abatunzi bakomeye kitwa Jardins de l’Avenue Foch i Paris.

Christie’s, inzu izwi ku isi mu kugurisha imitungo, ivuga ko iyo nzu ya Obiang ifite imbere “heza kandi hahenze”, ifitemo piscine, cinema yo mu rugo, n’inzu bwite y’urubyiniro (night club).

Mu 2017, iyi nzu yarafatiriwe nyuma y’uko urukiko rwo mu Bufaransa ruhamije Obiang icyaha cyo kunyereza umutungo wa rubanda rw’iwabo.

Yakatiwe kandi igifungo cy’imyaka itatu adahari n’ihazabu ya miliyoni 30€ (arenga miliyari 300 Frw).

Obiang yahakanye ibyaha yarezwe, avuga ko umutungo we uva mu nzira zemewe n’amategeko ndetse asaba guhagarika uko gufatira inzu ye mu rukiko rw’ubujurire. Ariko uru narwo rwagumishijeho uwo mwanzuro.

Ubu igihugu cye cyatanze ikirego gishya kirega ubufaransa mu Urukiko Mpuzamahanga Mpanabyaha gisaba ko uru rukiko guhagarika igurishwa ry’iyo nzu.

Equatorial Guinea ivuga ko Ubufaransa bwahonyoye inshingano zabwo mu muryango w’abibumbye (UN/ONU) zo kurwanya ruswa, nk’uko uru rukiko rwaregewe rubivuga.

Uretse ibyo mu Bufaransa, imitungo ya Obiang yafatiriwe kandi no muri Amerika, Brazil, n’Ubusuwisi. Umwaka ushize Ubwongereza nabwo bwamushyizeho ibihano bigendanye no kurwanya ruswa.