skol
Kigali

Israel itewe ubwoba na perezida mushya wa Iran Ebrahim Raisi

Amakuru   Yanditswe na: Dusingizimana Remy 20 June 2021

Israel yavuze ko amahanga akwiye kugira impungenge zikomeye kubera itorwa rya Ebrahim Raisi nka Perezida mushya wa Iran.

Lior Haiat, umuvugizi wa minisiteri y’ububanyi n’amahanga ya Israel, yavuze ko Bwana Raisi ari we Perezida wa mbere w’umuhezanguni cyane Iran igize kugeza ubu.

Uyu muvugizi yanaburiye ko uyu mutegetsi mushya azongera ibikorwa bya nikleyeri bya Iran.

Ku wa gatandatu ni bwo Ebrahim Raisi yatangajwe ko yatsinze amatora ya perezida muri Iran, yabonywe ahanini nk’ayakozwe mu buryo bumuha amahirwe kurusha abandi.

Bwana Raisi, uzarahira mu kwezi kwa munani, ni we mucamanza mukuru wa Iran kandi afite ibitekerezo bikarishye byo kudashaka impinduka.

Yafatiwe ibihano n’Amerika, kandi anavugwaho kugira aho ahuriye n’ibikorwa byo guha igihano cy’urupfu mu kivunge imfungwa za politiki mu bihe byashize.

Mu itangazo yasohoye nyuma y’intsinzi ye, yasezeranyije gukomeza icyizere rubanda igirira leta, no kuba umutegetsi w’abaturage bose.

Igitangazamakuru cya leta cyasubiyemo amagambo ye agira ati: "Nzashyiraho guverinoma ikorana umuhate, y’impinduramatwara kandi irwanya ruswa".

Ariko mu butumwa bunenga bwo kuri Twitter, Lior Haiat wo ku ruhande rwa Israel yavuze ko Bwana Raisi ari "umuhezanguni, ushishikariye guteza imbere gahunda ya nikleyeri irimo gutera imbere byihuse y’igisirikare cya Iran".

Iran na Israel bimaze igihe kirekire biri "mu ntambara ya rwihishwa", yatumye ibihugu byombi bigira uruhare mu bikorwa byo kwihimurana, ariko kugeza ubu byirinze kurwana byeruye.

Ariko mu gihe cya vuba aha gishize, ubushyamirane hagati y’ibi bihugu bwongeye kwiyongera nanone.

Igitera ubu bushyamirane ni uruhurirane rw’ibibazo, ariko kimwe mu bibazo bikomeye bibutera ni ibikorwa bya nikleyeri bya Iran.

Iran ishinja Israel kuba ari yo mu mwaka ushize yishe umuhanga mu bya nikleyeri wayo ukomeye, ndetse ikayishinja kugaba igitero mu kwezi kwa kane kuri kimwe mu bigo byayo bitunganya ubutare bwa uranium.

Hagati aho, Israel ntabwo yemera ibivugwa na Iran ko gahunda yayo ya nikleyeri igamije amahoro gusa, ikavuga ko izi neza ko Iran irimo gukora yubaka intwaro ya nikleyeri.

Amerika yavuze iki?

Amasezerano kuri nikleyeri ya Iran yo mu 2015, yayikuriragaho ibihano bikomeye bimwe mu gihe cyose na yo ihagaritse ibikorwa bimwe bya nikleyeri, yasenyutse ubwo uwari Perezida w’Amerika Donald Trump yayavagamo mu 2018.

Icyo gihe yongeye gushyiraho ibihano bikomeye byo mu rwego rw’ubukungu kuri Iran.

Ubutegetsi bwa Perezida w’Amerika Joe Biden ubu burimo kugerageza gushaka uburyo bwasubira muri ayo masezerano.

Mu gusubiza ku bihano bikomeye yari yongeye gufatirwa, Iran yongereye ibikorwa byayo bya nikleyeri, ndetse ubu irimo gutunganya uranium ku bipimo byo hejuru cyane - nubwo itaragera ku bipimo byayo bikenewe ngo ishobore gukora intwaro zo ku rwego rwa nikleyeri.

Ivuga ku byavuye mu matora, Amerika yavuze ko ibabajwe no kuba Abanya-Iran "babujijwe uburenganzira bwo guhitamo abategetsi babo mu matora akozwe mu bwisanzure no mu mucyo".

Abitabiriye amatora bari ku gipimo cya mbere cyo hasi cyane kibayeho mu matora muri iki gihugu, abatageze kuri 50% by’abari biyandikishije ngo batore ni bo bagiye gutora, ugereranyije n’abarenga 70% batoye mu matora yo mu 2017.

Abantu benshi banze kwitabira aya matora, bemeza ko yakozwe ku buryo buha amahirwe menshi Bwana Raisi, inshuti ikomeye y’umutegetsi w’ikirenga wa Iran Ayatollah Ali Khamenei.

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

IBYAKOZWE N’INTUMWA EP#49: Ubuzima bwa Gen Bosco NTAGANDA uzwi nk’umwicanyi...

Mu kiganiro IBYAKOZWE N’INTUMWA EP#49 kigaruka ku buzima bw’Indwanyi,Gen...
12 October 2021 0

Perezida wa Taiwan yavuze ko biteguye guhangana n’Ubushinwa

Perezida Tsai Ing-wen avuga ko Taiwan itazagamburuzwa n’igitutu iri kotswa...
10 October 2021 0

Inteko ya EU yamaganye yasabye ko Rusesabagina ahita arekurwa

Inteko ishingamategeko y’Ubumwe bw’Uburayi (EU) kuwa kane yamaganye urubanza...
8 October 2021 0

Guinea: Perezida w’inzibacyuho yashyizeho Minisitiri w’intebe...

Col Mamady Doumbouya ukuriye agatsiko k’abasirikare bahiritse ubutegetsi...
7 October 2021 0

Koreya ya Ruguru irashaka kwiyegereza iy’Epfo ikayitandukanya...

Nyuma y’imyaka ikabakaba ibiri Koreya ya Ruguru iri mu kato karushijeho...
5 October 2021 0

Col Mamady Doumbouya yarahiriye kuba Perezida wa Gineya w’inzibacyuho

Muri Guinea, umukuru w’abasirikare bakoze kudeta, Lieutenant-colonel Mamady...
1 October 2021 0