Jeanine Áñez wahoze ari Perezida w’inzibacyuho wa Bolivia, yatawe muri yombi hamwe n’abandi benshi bahoze ari ba minisitiri.

Abashinjacyaha bavuga ko mu mwaka wa 2019, we n’abo bari ba minisitiri bagize uruhare mu ihirikwa ku butegetsi ry’uwari Perezida Evo Morales.

Bwana Morales yareguye ahunga Bolivia, nyuma y’imyigaragambyo n’ibirego by’uburiganya mu matora.

Madamu Jeanine yavuze ko arimo kuzira amasinde muri politike afitiwe n’ishyaka rya gisosiyalisti, MAS, rya Bwana Morales, ryongeye gusubira ku butegetsi.

Iryo shyaka ryatsinze ku bwiganze amatora ya perezida n’ay’abagize inteko ishingamategeko yabaye mu kwezi kwa cumi mu mwaka wa 2020, bicira inzira Bwana Morales yo gusubira muri Bolivia avuye muri Argentina ajya ku buyobozi bwaryo.

Mugenzi we Luis Arce ni we watorewe kuba Perezida, nubwo Bwana Arce yashimangiye mu kiganiro na BBC mu mwaka ushize ko azakurikiza umurongo we wa politike, ko atazagendera ku bya Evo Morales.

Nka senateri wo hejuru cyane, Madamu Jeanine yari yahise aba usigaye ari perezida ubwo Bwana Morales yahungaga.

Ariko abayoboke b’ishyaka MAS bamushinje ko afatanyije n’abakuru ba polisi n’igisirikare ari bo bacuze umugambi wo guhirika Bwana Morales.

Yafunzwe mu masaha ya mu gitondo kuri uyu wa gatandatu mu mujyi wa Trinidad, nkuko byatangajwe kuri Facebook na Minisitiri Eduardo Del Castillo Del Carpio wo muri leta ya Bolivia. Nuko nyuma atwarwa n’indege ajyanwa mu mujyi wa La Paz.

Mbere yaho, Madamu Jeanine yatangaje kuri Twitter ko "itotezwa muri politike ryatangiye", anavuga ko inyandiko yo kumuta muri yombi ikubiyemo ibirego by’iterabwoba, kugumura rubanda n’ubugambanyi.

Televiziyo y’igihugu ya Bolivia yanatangaje amashusho ya Rodrigo Guzman wahoze ari Minisitiri w’ingufu (cyangwa umuyagankuba mu Kirundi) na Alvaro Coimbra wahoze ari Minisitiri w’ubutabera, barimo gufungwa.

Bwana Morales yahunze Bolivia mu kwezi kwa cumi na kumwe mu mwaka wa 2019.

Hari hashize ibyumweru haba imyigaragambyo irimo ibikorwa by’urugomo ndetse na nyuma yuko igisirikare kiretse kumushyigikira muri gahunda ye itavugwaho rumwe yo gushaka kwiyamamariza manda ya kane.

Inshuti ze nyinshi zari mu myanya ikomeye na zo icyo gihe zahunze igihugu.

BBC