Inteko ishinga amategeko y’u Burundi, umutwe wa Sena, imaze kwemeza ihindurwa ry’Umushinjacyaha Mukuru w’iki gihugu, Nyandwi Sylvestre wari usanzwe kuri izi nshingano asimbuzwa Manirakiza Léonard.

Iki cyemezo gifatiwe mu nama ya sena idasanzwe, yayobowe na Perezida wayo, Sinzohagera Emmanuel, yitabirwa na Perezida w’u Burundi, Ndayishimiye Evariste mu gitondo cy’uyu wa 25 Nyakanga 2023.

Hanemejwe kandi abacamanza bashya 8 b’urukiko rw’ikirenga, ari bo: Baragengana Modeste, Bizimana Clotilde, Kaneza Clarisse, Havyarimana Laurent, Habonimana Josiane, Ntukamazina Thomas, Nkundwanimana Alexis na Nshimirimana Déo.

Bivugwa ko, n’ubwo bitatangajwe, Perezida Ndayishimiye yaraye yeguje Nyandwi kuri uyu wa 24 Nyakanga 2023, bigendanye n’amakosa atandukanye yakoreye mu nshingano ye nk’Umushinjacyaha Mukuru.

Nyandwi asimbuwe mu gihe uru rwego yari ayoboye rwari rufite dosiye ikomeye ya Général Alain-Guillaume Bunyoni ukurikiranweho ibyaha bitandukanye birimo gutunga intwaro mu buryo butemewe no gutuka Umukuru w’Igihugu.