Perezida Xi Jinping w’Ubushinwa yahuye na mugenzi we Joe Biden wa Amerika muri Mulia hotel i Bali muri Indonesia aho Xi acumbitse, mu nama yamaze amasaha atatu baganira ku ngingo zitandukanye.
Iyi ni yo nama ya mbere y’imbonankubone yahuje aba bagabo bakuriye ibihugu by’ibihangange ku isi kuva Biden yagera ku butegetsi mu 2021.
Gusa bagiye bavugana kenshi kuri telephone na ‘video calls’ ndetse bagiye bahura kenshi mu gihe cyashize ku butegetsi bwa Obama.
Xi na Biden bari muri Indonesia mu (...)

Sponsored Ad

Perezida Xi Jinping w’Ubushinwa yahuye na mugenzi we Joe Biden wa Amerika muri Mulia hotel i Bali muri Indonesia aho Xi acumbitse, mu nama yamaze amasaha atatu baganira ku ngingo zitandukanye.

Iyi ni yo nama ya mbere y’imbonankubone yahuje aba bagabo bakuriye ibihugu by’ibihangange ku isi kuva Biden yagera ku butegetsi mu 2021.

Gusa bagiye bavugana kenshi kuri telephone na ‘video calls’ ndetse bagiye bahura kenshi mu gihe cyashize ku butegetsi bwa Obama.

Xi na Biden bari muri Indonesia mu nama ya G20 ihateraniye, yatangiye ku mugaragaro none kuwa kabiri.

Mu nama yabo yarangiye bitinze mu ijoro ryacyeye, Xi na Biden baganiriye ku bibazo bya Taiwan, Korea ya Ruguru, n’intambara y’Uburusiya muri Ukraine.

Nyuma y’iyo nama, Biden yizeje ko nta “ntambara y’ubutita nshya” izabaho hagati yabo n’Ubushinwa, yongeraho kandi ko abona ko Ubushinwa butazatera Taiwan.

Xi nawe asa n’uwemeza ibyo, ashimangira mu gutangiza iyo nama yabo ko “tugomba kwemeranya ku nzira ikwiye y’umubano w’Ubushinwa na Amerika” kubera ko “isi ubu yageze mu mayirabiri”.

Xi asubirwamo n’ibinyamakuru byaho agira ati: “Umubano w’Ubushinwa na Amerika ntukwiye kuba uwo hasi hejuru…Isi ishobora kwakira iterambere n’uburumbuke buhuriweho bw’Ubushinwa na Amerika”.

Ikinyamakuru cya leta ya Beijing cyo cyatangaje ko Xi Jinping yaburiye mugenzi we Biden kwirinda kurenga “umurongo utukura” kuri Taiwan.

Ibindi biri kuganirwaho na G20

Intambara ya Ukraine, kwangirika kw’uruhererekane rw’ubucuruzi bw’ibiribwa ku isi, ibyorezo n’ingaruka za Covid-19, ihindagurika ry’ikirere, ni zimwe mu ngingo zirimo kwibandwaho muri iyi nama.

Abategetsi b’ibihugu 19 n’Ubumwe bw’Uburayi bari muri iyi nama, batumiye kandi bamwe mu bakuriye imiryango y’iterambere ihuriwemo n’ibihugu, nka Perezida Paul Kagame w’u Rwanda, Macky Sall wa Senegal, uyu munsi kandi bumvise ijambo rya Perezida Zelensky wa Ukraine.

Perezida Zelensky yamaganye intambara y’Uburusiya ndetse, abishaka, avuga ko iyi nama ari “G19”, asubiramo ko akuyemo Uburusiya ku bushake, nubwo bwose muri iyi nama Perezida Putin ahagarariwe na Minisitiri w’ububanyi n’amahanga Segei Lavrov.

Zelensky yabwiye abategetsi bari aho ko “ubu ni cyo gihe intambara isenya y’Uburusiya igomba kandi ishobora guhagarikwa. Bizakiza ibihumbi by’abantu.”

Minisitiri w’intebe wa Cambodia bamusanzemo Covid

Minisitiri w’intebe Hun Sen wa Cambodia yahagaritse inama yari kujyamo muri G20 nyuma y’uko bamusanzemo Covid-19.

Uyu mugabo bamusanzemo Covid mbere y’uko hari inama n’imwe ajyamo aho muri Indonesia.

Byari biteganyijwe ko mu bo ahura nabo harimo Perezida Xi Jinping w’Ubushinwa na Emmanuel Macron w’Ubufaransa.

Yari amaze iminsi akuriye inama y’ibihugu bya Aziya y’amajyepfo yarangiye ku cyumweru muri Cambodia, inama anabereye umuyobozi, kandi kuwa gatandatu yahuye na Perezida Joe Biden wa Amerika.

BBC