Perezida wa RDC,Felix Tshisekedi yagejeje kandidatire ye muri Komisiyo y’igihugu ishinzwe amatora kugira ngo yongera kuyobora igihugu muri manda ya kabiri.

Aherekejwe n’umugore we n’abana be,Perezida Tshisekedi yashyikirije Komisiyo y’Amatora,CENI,kandidatire ye kugira ngo ahangane n’abandi banyapolitike bazwi muri RD Congo mu matora azaba mu mpera z’uyu mwaka.

Perezida Tshisekedi agiye guhangana n’abatavuga rumwe n’ubutegetsi bwe barimo Moïse Katumbi,Martin Fayulu na Denis Mukwege.

Tshisekedi yatanze kandidatire mu gihe igihugu cye kiri mu ntambara ikomeye ihanganishije igisirikare cye n’umutwe wa M23 ukomeje kwigarurira uduce dutandukanye mu Burasirazuba bw’Igihugu.

Kuri uyu wa Gatandatu, M23 yigaruriye agace ka Kitchanga mu gihe ku wa Gatanu yigaruriye Kilolirwe.

Manda ye ya mbere yaranzwe n’ibibazo byinshi birimo intambara n’umutekano muke, ubukene mu ngeri zose, ibibazo by’ubuzima ndetse no kwibasira abatavuga rumwe n’ubutegetsi bwe.