Perezida Tshisekedi yemereye abakuru b’Ibihugu bigize Umuryango wa Afurika y’Iburasirazuba (EAC) ko Guverinoma ye izagirana ibiganiro n’umutwe wa M23,umaze amezi menshi uhanganye n’ingabo ze.
Muri iyi nama yabereye i Burundi mu cyumweru gishize,abakuru b’ibihugu basabye ko intambara mu Burasirazuba bwa RDC ihagarara vuba ndetse na Perezida Felix Tshisekedi yemerera bagenzi be ko agiye kuganira na M23.
Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe ibikorwa (...)

Sponsored Ad

Perezida Tshisekedi yemereye abakuru b’Ibihugu bigize Umuryango wa Afurika y’Iburasirazuba (EAC) ko Guverinoma ye izagirana ibiganiro n’umutwe wa M23,umaze amezi menshi uhanganye n’ingabo ze.

Muri iyi nama yabereye i Burundi mu cyumweru gishize,abakuru b’ibihugu basabye ko intambara mu Burasirazuba bwa RDC ihagarara vuba ndetse na Perezida Felix Tshisekedi yemerera bagenzi be ko agiye kuganira na M23.

Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe ibikorwa by’Umuryango wa Afurika y’Iburasirazuba, Prof Nshuti Manasseh wari muri iyi nama, yavuze ko bimwe mu byaganiriweho muri iyi nama ari ugusaba Guverinoma ya Repubulika ya Demokarasi ya Congo kugirana ibiganiro n’imitwe yose harimo n’uwa M23 yari yaranze kuganira na wo.

Prof Nshuti Manasseh yabwiye ikinyamakuru IGIHE ko Perezida Tshisekedi ubwe yemeye ko Guverinoma y’Igihugu cye igiye kuganira na M23.

Yagize ati “Yarabyemeye, erega urumva ni ukumvikana nk’akarere icyakorwa. Guhagarika imirwano, gusubira inyuma ariko byose bikajyana n’ibiganiro.”

Prof Manasseh yavuze ko Guverinoma ya DRC yemeye kuganira na M23 nyuma yuko ibisabiwe muri iyi nama y’Abakuru b’Ibihugu.

Ati “Twababwiye ko bavugana, kandi kuri iyi nshuro twemeranyije ko bagiye kuvugana na bo.”

Yakomeje avuga ko nta yindi nzira nziza yatanga igisubizo kiboneye, atari ibiganiro kandi ko ari yo yakunze kugaragazwa n’akarere.

Yagize ati “Icyo twumvikanyeho nk’akarere kandi dutekereza ko ari cyo gisubizo cyiza kuri iki kibazo, nta kintu gisumba kuvugana.”

Yanagarutse ku byo kuba Guverinoma ya Repubulika Iharanira Demokarasi ya Congo, ikomeje kwifuza ko ingabo ziri mu butumwa bw’akarere ka Afurika y’Iburasirazuba zakwinjira mu rugamba rwo guhashya umutwe wa M23, avuga ko ibi bitari mu byajyanye izi ngabo.

Yagize ati “Icyo basabwe ni uguhagarika imirwano hanyuma bagasubira inyuma ariko baganira. Ibyo kuvuga ko ingabo za EAC zabarasa, ntabyavuzwe mu biganiro.”

Muri iyi nama y’i Bujumbura, Abakuru b’Ibihugu bemeranyijwe ko Ibihugu byose bigize uyu Muryango wa Afurika y’Iburasirazuba byohereza ingabo muri Congo nkuko byemeranyijweho ariko kugeza ubu hakaba hari ibitarazoherezayo.

Prof Nshuti Manasseh yakomeje atsindagira ko izi ngabo z’akarere ka Afurika y’Iburasirazuba zifite inshingano zo gutanga ubufasha mu nzira yo gushaka amahoro aho kuba ari ukurwana.

Yagize ati “Si ukubafasha kurwana cyangwa gufasha Tshisekedi ngo tumutize ingufu zo kurwana, oya, ni ibiganiro bya politiki.”

Izi ngabo ziyobowe n’iza Kenya, zagiye zigaragara mu bikorwa byo kuganira na M23 ndetse uyu mutwe wagiye urekura bimwe mu bice wari warafashe, ukabisiga mu maboko yazo.