Ibaze ubaye uri Vladimir Putin.

Sponsored Ad

Uburengerazuba bw’isi bwaguhimbye igicibwa kubera gutera Ukraine. Ibihano bifite intego yo guca ubukungu bw’igihugu cyawe ku masoko mpuzamahanga.

Ndetse urukiko mpuzamahanga mpanabyaha rukaba rwarasohoye urwandiko rwo kuguta muri yombi.

Ni gute wagaragaza ko igitutu kitarimo gukora? Kugerageza kwakira inama.

Muri iki cyumweru, mu mujyi wa Kazan, Perezida Putin azasuhuza abakuru b’ibihugu barenga 20 mu nama y’ihuriro rya BRICS ry’ibihugu bifite ubukungu burimo kuzamuka.

Mu bategetsi batumiwe harimo Perezida w’Ubushinwa Xi Jinping, Minisitiri w’intebe w’Ubuhinde Narendra Modi na Perezida wa Irani Masoud Pezeshkian.

Ibiro bya perezida w’Uburusiya (bizwi nka Kremlin) byise iyo nama kimwe "mu bikorwa binini cyane bya politike y’ububanyi n’amahanga bibayeho" mu Burusiya.

Chris Weafer, washinze ikigo Macro-Advisory cy’ubugishwanama, agira ati: "Ubutumwa busobanutse [ibi bitanga] ni uko amagerageza yo gushyira mu kato Uburusiya yananiwe."

"Ni igice kinini cy’ibigize ubutumwa bwa Kremlin ko Uburusiya burimo guhangana n’ibihano. Turabizi ko hari imitutu [kwiyasa] ikomeye munsi y’ubutaka [munsi y’ibigaragarira amaso].

"Ariko ku rwego rw’umubano mpuzamahanga, Uburusiya bufite izi nshuti zose kandi zose zigiye kuba abafatanyabikorwa b’Uburusiya."

None, inshuti z’Uburusiya ni izihe?

BRICS ni impine yo mu Cyongereza ya Brezili, Uburusiya, Ubuhinde, Ubushinwa n’Afurika y’Epfo. Uwo muryango, akenshi uvugwa ko ari uwo kuringaniza umunzani w’isi itegekwa n’uburengerazuba, waragutse ujyamo na Misiri, Ethiopia, Irani na Emira Zunze Ubumwe z’Abarabu (UAE).

Arabie Saoudite na yo yahawe ubutumire bwo kuwinjiramo.

Ibihugu byo muri BRICS byihariye 45% by’abaturage b’isi. Ubuteranyije, ubukungu bw’ibihugu biri muri uwo muryango bufite agaciro ka tiriyari zirenga 28.5 z’amadolari y’Amerika. Izo zingana na 28% y’ubukungu bw’isi.

Abategetsi bo mu Burusiya bumvikanishije ko ibindi bihugu 30 bishaka kwinjira muri BRICS cyangwa bishaka kugirana umubano wa hafi cyane n’uwo muryango. Bimwe muri ibyo bihugu bizitabira iyo nama.

I Kazan muri iki cyumweru, witege kumva ibiganiro byinshi bivuga ku kuntu BRICS ihagarariye "ba nyamwinshi bo ku isi".

Ariko uretse guha akanya Vladimir Putin ku rubuga rw’umubano mpuzamahanga, ni iki iyi nama ishobora kugeraho?

Mu gihe Putin ashishikajwe no kugabanya igitutu cy’ibihano by’uburengerazuba, azaba yizeye kwemeza abanyamuryango ba BRICS ishyirwaho ry’irindi faranga risimbura idolari ry’Amerika ryo gukoresha mu kwishyura ku rwego mpuzamahanga.

Weafer agira ati: "Byinshi mu bibazo byugarije ubukungu bw’Uburusiya bifitanye isano n’ubucuruzi bwambukiranya imipaka no kwishyura. Ndetse byinshi muri byo bifite aho bihuriye n’idolari ry’Amerika."

"Minisiteri y’imari y’Amerika ifite ububasha bwinshi cyane n’ijambo rikomeye cyane ku bucuruzi bwo ku isi kubera gusa ko idolari ry’Amerika ari ryo faranga ry’ingenzi ryo kwishyuramo. Igishishikaje Uburusiya cy’ingenzi ni ugusenya ubwiganze bw’idolari ry’Amerika.

"Burashaka ko ibihugu byo muri BRICS bishyiraho ubundi buryo bw’ubucuruzi n’uburyo bwo kwishyura bwambuka imipaka butarimo idolari, iri Euro [ryo mu muryango w’Ubumwe bw’Uburayi] cyangwa irindi faranga iryo ari ryo ryose ryo muri G7 [itsinda ry’ibihugu birindwi bikize cyane ku isi], kugira ngo ibihano ntibizagire icyo biba bivuze cyane."

Ariko abanenga BRICS bagaragaza amatandukaniro ayirimo. "Kubona ibintu kimwe" si imvugo wakoresha mu gusobanura abanyamuryango bayo kuri ubu.

Jim O’Neill, wahoze akuriye ubukungu muri Goldman Sachs, agira ati: "Mu buryo runaka, ni ikintu cyiza ku burengerazuba kuba Ubushinwa n’Ubuhinde bidashobora na rimwe kugira ikintu byemeranyaho. Kuko iyo ibyo bibiri biba rwose bikomeje, BRICS yagira ijambo rikomeye cyane."

"Ubushinwa n’Ubuhinde birimo gukora uko bishoboye kose mu kwirinda gushaka kwibasirana igihe kinini. Kugerageza gutuma rwose bikorana mu by’ubukungu ni ingorane itagira iherezo."

Mu mpera y’ikinyejana gishize, O’Neill ni we wacuze impine "BRIC" isobanuye ibihugu bine by’ubukungu burimo kuzamuka, yemezaga ko bikwiye "kuzanwa hagati na hagati mu igenamigambi ry’isi".

Ariko izo nyuguti enye zahisemo kuba ukwazo, nyuma yuko ibihugu bijyanye na zo bikoze umuryango wabyo wa BRIC – nyuma waje kuba BRICS, ubwo Afurika y’Epfo na yo yawinjiragamo.

Byagerageje guhangana n’ubwiganze bwa G7, itsinda ry’ibihugu birindwi bifite ubukungu bunini cyane "bukataje" (Canada, Ubufaransa, Ubudage, Ubutaliyani, Ubuyapani, Ubwongereza n’Amerika).

Si Ubuhinde n’Ubushinwa gusa bitabona ibintu kimwe. Hari ubushyamirane hagati y’abanyamuryango babiri muri bashya cyane binjiye muri BRICS, ari bo Misiri na Ethiopia.

Ndetse, nubwo bivugwa ko ubushyamirane bwacururutse, Irani na Arabie Saoudite bimaze igihe kirekire ari abacyeba mu karere biherereyemo.

O’Neill agira ati: "Igitekerezo cyuko byose bizumvikana mu buryo bw’ibanze ku kintu gikomeye [ibyo] ni ubusazi rwose."

Kandi nubwo Uburusiya, kubera ibitekerezo byo kurwanya uburengerazuba, buvuga ku gushinga "imitegekere mishya y’isi", abandi banyamuryango ba BRICS, nk’Ubuhinde, bashishikajwe no kugumana umubano mwiza muri politike no mu bukungu n’uburengerazuba.

I Kazan, umurimo wa Vladimir Putin uzaba guca hejuru (gusimbuka) ibibatandukanya no kugaragaza ishusho y’ubumwe, mu gihe agaragariza Abarusiya – n’amahanga – ko igihugu cye kiri kure y’akato.