Umunyapolitiki utavuga rumwe n’ubutegetsi muri Repubulika ya Demokarasi ya Congo, Franck Diongo, Perezida w’ishyaka rya politiki, Mouvement Lumumbiste Progressiste (MLP), yatawe muri yombi n’abantu bitwaje intwaro batamenyekanye.

Byabaye kuri uyu wa 20.06.2023, kuri avenue des Huileries, ku mahuriro ya Kabinda, abamurindaga babura icyo bakora baca bugufi batwara Boss wabo.

Mediacongo.net ntiyatangaje nyirizina icyaba cyatumye uyu murwanashyaka atabwa muri yombi cyangwa ngo ababikoze bamenyekane kuko nta rwego rw’igihugu ruragira icyo rutangaza.

Franck Diongo yari avuye kwitabira umuhango wo gushyingura umwe mu bo bakoranye, Dr Kabamba, umuhango warimo n’umukuru w’igihugu, Félix Tshisekedi.

Ubwo yari avuye gushyingura rero, yafashwe, nk’uko byemezwa na perezida w’ihuriro ry’urubyiruko rwa MLP, Jonathan Makoba.