Mu ibarura ry’amajwi rikomeje mu matora ya Perezida mri RD Congo,Perezida Tshisekedi ushaka manda ya 2 arayoboye cyane imbere ya Katumbi na Fayulu bari mu bahabwaga amahirwe yo gutsinda.

Muri miliyoni zikabakaba 10 z’amajwi amaze kubarurwa no gutangazwa by’agateganyo mu matora yo muri Repubulika ya Demokarasi ya Kongo,Perezida uriho Tshisekedi ari hejuru cyane.

Mu majwi 9.333.562 amaze gutangazwa, Félix Tshisekedi arayoboye n’amajwi 7.219.816, ni ukuvuga 77.35%. Akurikiwe na Moïse Katumbi n’amajwi 1.466.503 (15.71%) na Martin Fayulu n’amajwi 363.513 (3.89%). Adolphe Muzito na Radjabho Tebabho bakurikiraho na 0,63% na 0.55%.

Ariko, abatavuga rumwe na leta bamaganye byimazeyo ibyavuye mu matora. Martin Fayulu yagize ati: "Bwana Tshisekedi, muri uyu mujyi wa Kinshasa, ashobora kugira 80% muri komini imwe? Amajwi ntahuye na gato no kwiyamamaza."

Uyu yakomeje avuga ko n’imashini zitorerwaho zapfuye kugira ngo habeho uburyo bwo kwiba amajwi.

Moïse Katumbi, agaragaza ko yemeranya na Martin Fayulu, yamagana byimazeyo igitutu abaturage ba Kinshasa bahuye nacyo, cyane cyane abashyigikiye ECIDE, ishyaka rya Fayulu.

Yatangaje ko hari ibindi bikorwa byo kwigaragambya bizaba mu gihugu hose kandi yemeza ko "uburiganya,gutekinika n’ikinyoma bitazahabwa intebe."