Imyaka ya ba Perezida benshi bo ku mugabane wa Afurika irenze kure cyane imyaka igenwa n’amategeko yo kujya mu kiruhuko cy’izabukuru ku bakozi.

Sponsored Ad

Mu bihugu byinshi bya Afurika, imyaka isanzwe yo kujya mu kiruhuko cy’izabukuru ku bakozi ni 60. Icyakora, abaperezida bo muri Afrika bakomeza gutegeka hejuru yayo.

1. Paul Biya – Cameroun

Imyaka : 90 (13/02/ 1933)

Paul Biya yayoboye igihugu cya Kameruni kuva ku ya 6 Ugushyingo 1982. Ni perezida wa kabiri umaze igihe kirekire ku butegetsi muri Afurika, umuyobozi utari umwami urambye ku butegetsi,akaba n’umukuru w’igihugu ushaje cyane kurusha abandi ku isi.

2. Alassane Ouattara – Côte d’Ivoire

Imyaka: 81 (1/01/1942)

Alassane Dramane Ouattara yabaye Perezida wa Côte d’Ivoire kuva mu 2011. Mbere y’aho, yabaye Minisitiri w’intebe wa Côte d’Ivoire kuva mu Gushyingo 1990 kugeza Ukuboza 1993. Ouattara yatangiye kuyobora Rassemblement des Républicains (RDR), ishyaka rya politiki muri Cote d’Ivoire, mu 1999. Yatsinze amatora yo mu 2010 kandi ari ku butegetsi kuva icyo gihe.

3. Teodoro Nguema Mbasogo – Guinée Équatoriale

Imyaka : 81 (5/06/ 1942)


Teodoro Obiang Nguema Mbasogo ni umunyapolitiki ukomeye wa Equatorial Guinea,wahoze ari umusirikare mukuru ndetse akaba ari perezida wa kabiri w’iki gihugu kuva ku ya 3 Kanama 1979.

Afite amateka yo kuba perezida umaze igihe kinini ku butegetsi mu mateka y’isi.

4. Emmerson Dambudzo Mnangagwa – Zimbabwe

Imyaka : 80 (15 /09/ 1942)

Emmerson Dambudzo Mnangagwa ni umunyapolitiki wo muri Zimbabwe wabaye Perezida wa Zimbabwe kuva ku ya 24 Ugushyingo 2017. Afite imyaka 80, Mnangagwa, yafashe ubutegetsi nyuma yo guhirika ubutegetsi bwa Robert Mugabe, arimo yubaka izina rye nk’umuyobozi ukomeye cyane,aho ashinjwa igitugu.

Yiswe “ingona” muri Zimbabwe,yatorewe manda ya kabiri mu matora yabaye mu cyumweru gishize.

5. Nana Akufo-Addo – Ghana

Imyaka : 79 (29/03/ 1944)

Ku ya 7 Ukuboza 2017, Nana Akufo-Addo yatangiye kuyobora igihugu cya Ghana.Yigeze kuba Minisitiri w’Ububanyi n’amahanga wa Ghana.

6. Yoweri Museveni – Uganda
Imyaka : 78 (15/09/ 1944)

Uyu munya Uganda, Yoweri Museveni yari mu nyeshyamba zirukanye abanyagitugu bayoboye Uganda nka Idi Amin (1971-1979) na Milton Obote (1980-1985).

Perezida Museveni yahinduye itegekonshinga, akuraho manda ntarengwa ya perezida mu 2005, bituma ingoma ye ikomeza.

7. Abdelmadjid Tebboune – Algérie
Imyaka : 77 (17 /11/1945)

Kuri ubu Abdelmadjid Tebboune ni Perezida kuva mu Kuboza 2019,wigeze kuba yari Minisitiri w’ingabo. Tebboune yagiye akora imirimo itandukanye, harimo na minisitiri w’intebe mu gihe cy’ubutegetsi bw’uwahoze ari perezida, Abdelaziz Bouteflika, wahatiwe kwegura muri Mata kubera imyigaragambyo ikaze.

Manda ye yo kuba Minisitiri w’intebe yatangiye muri Gicurasi 2017, yamaze amezi ane. Bivugwa ko byatewe n’uko yaba yaragerageje kwiyerekana nk’umusimbura wa Bouteflika mu nama yabonanye na mugenzi we w’Ubufaransa, Edouard Philippe, i Paris iminsi mike mbere yuko yirukanwa.