Guverinoma ya Romania yeguje uwari Ambasaderi wayo muri Kenya, Dragos Viorel Tigau, wise inkende intumwa y’Abanyafurika.

Mu nama yaberaga mu nyubako y’Umuryango w’Abibumbye i Nairobi tariki ya 26 Mata 2023, Ambasaderi Tigau yabonye inkende mu idirishya ryaho maze agira ati: “Itsinda ry’Abanyafurika ritwiyunzeho.”

Aya magambo yateje umwuka mubi mu cyumba cy’inama, Ambasaderi wa Sudani y’Epfo muri Kenya, Chol Ajong’o wari uyoboye itsinda ry’abadipolomate bari bateraniye i Nairobi ayamagana yivuye inyuma.

Minisiteri y’ububanyi n’amahanga ya Romania kuri uyu wa 10 Kamena 2023, yatangaje ko yamenyeshejwe amagambo Ambasaderi Tigau yavugiye i Nairobi, iyasabira imbabazi. Iti: “Turicuza ku bw’ibyabaye kandi turasaba imbabazi abagizweho n’ingaruka.”

Iyi Minisiteri yakomeje ivuga ko ifite icyizere ko amagambo ya Ambasaderi Tigau atazahungabanya umubano wa Romania na Afurika, kandi ngo yafashe icyemezo cyo gukura uyu mudipolomate kuri izo nshingano.