Polisi ya Tanzaniya yataye muri yombi umunyamategeko n’umunyapolitiki utavuga rumwe n’ubutegetsi ibashinja gushishikariza no gutegura imyigaragambyo mu gihugu hose igamije guhirika leta.

Polisi yataye muri yombi umunyamategeko Boniface Anyasile Mwabukusi na Mpaluka Nyagali kuwa gatandatu w’iki cyumweru twaraye dusoje , nk’uko umuvugizi we, David Misime, yabitangaje.

Philip Mwakilima, umunyamategeko wunganira aba bombi, yatangarije Reuters ko arimo gukora ibishoboka ngo abageraho aho bafungiwe kandi ko ibyo baregwa ari "ibinyoma, ari ibihimbano".

Umuyobozi wa polisi muri Tanzania, Camillus Wambura, ku wa Gatanu, mu itangazo rye yatangaje ko arimo gufata ingamba zo kurwanya itsinda riteganya gukora imyigaragambyo hirya no hino mu gihugu hagamijwe gushyira hasi Guverinoma ya Perezida Samia Suluhu Hassan mbere ya 2025.

Yavuze ko ibirimo gushyirwa ku mbuga nkoranyambaga kuva ku itariki ya 10 Kanama byanditswe "kugira ngo bishishikarize Abanyatanzaniya kujya mu myigaragambyo mu gihugu hose. Umwe muri bo ndetse yavuze ko bazahirika guverinoma ya perezida ... mbere ya 2025. Ubu ni ubuhemu."

Abahamagarira imyigaragambyo bahujije iki kibazo n’ikirego kiri mu rukiko cyamagana amasezerano yo guteza imbere n’imicungire y’icyambu hagati ya Tanzania na Leta ya Dubai inteko ishinga amategeko ya Tanzaniya yemeje muri Kamena, nk’uko Wambura avuga.

Mwabukusi yari umwe mu banyamategeko bajuririye ayo masezerano yemejwe. Ku wa Kane, Urukiko Rukuru rwateye utwatsi ubwo bujurire. Uyu yari yanditse kuri twitter ko abakiriya be ari bo bamusabye kujuririra icyo cyemezo.

Ku wa Mbere, Human Rights Watch yavuze ko byibuze abantu 22 bafunzwe cyangwa batewe ubwoba kuva muri Kamena bazira kunenga kuba inteko ishinga amategeko yaremeje ayo amasezerano y’imicungire y’icyambu.