Perezida wa Repubulika ya demukarasi ya Congo, Félix Tshisekedi, yatangaje ko nta ruhare uwo yasimbuye ku butegetsi, Joseph Kabila, yagize ngo atsinde amatora y’Umukuru w’Igihugu mu mwaka w’2018.

Ibi yabivugiye mu kiganiro yagiranye n’abanyamakuru ku mugoroba wo kuri uyu wa 19 Nzeri 2023, nyuma y’aho Corneille Nangaa wayoboraga komisiyo y’amatora mu 2018 yatangaje ko Tshisekedi yageze ku ntsinzi abikesha ubwumvikane yagiranye na Kabila.

Muri aya matora, ishyaka PPRD rya Kabila ryari rihagarariwe na Emmanuel Ramazani Shadary, ndetse ni we wahabwaga amahirwe yo gutsindira uyu mwanya, gusa komisiyo y’amatora yaje gutungurana, itangaza ko yagize amajwi 23.83%, Tshisekedi agira 38.56%, Martin Fayulu agira 34.82%.

Intsinzi ya Tshisekedi yamaganwe na Fayulu n’ubu ucyemeza ko ari we watowe ku bwiganze bw’amajwi, ndetse hari n’ibihugu n’imiryango mpuzamahanga n’ibihugu byanze kuyemera, bikeka ko aya matora yaba yarabayemo amanyanga.

Tshisekedi kuri uyu wa 19 Nzeri yatangaje ko nta mishyikirano yagiranye na Kabila ngo bibe amatora. Ati: “Nta bwumvikane bwo kwiba bwabaye hagati y’uwatsinze ariya matora uri imbere yanyu n’uwo yasimbuye. Njyewe natsinze amatora, nzi ko nakuyemo umusaruro, ntabwo nagiye muri ibyo bintu.”

Muri RDC hateganyijwe amatora y’Umukuru w’Igihugu mu Kuboza 2023. Perezida Tshisekedi yatangaje ko hari byinshi yakoze muri manda ya mbere ku buryo ashaka kubikomerezaho mu gihe yatorerwa manda ya kabiri.