Urukiko rwo muri Israel rwafunze uwahoze akora isuku kwa Minisitiri w’ingabo Benny Gantz, wagerageje guha amakuru itsinda ry’abinjira muri za mudasobwa (hackers) rifitanye imikoranire na Iran.

Sponsored Ad

Urukiko rwo muri Israel rwafunze uwahoze akora isuku kwa Minisitiri w’ingabo Benny Gantz, wagerageje guha amakuru itsinda ry’abinjira muri za mudasobwa (hackers) rifitanye imikoranire na Iran.

Omri Goren, w’imyaka 38, yakatiwe gufungwa imyaka itatu bijyanye n’amasezerano yo kwemera icyaha yatumye abashinjacyaha bamukuriraho ibirego byo gukora ubutasi.

Minisiteri y’ubutabera ya Israel yavuze ko Goren yabwiye itsinda Black Shadow ry’aba ’hackers’ ko ashobora kuryoherereza amakuru kuri Gantz no gushyira software (logiciel) yo kwanjiza (malware) muri mudasobwa ye, na ryo rikamuha amafaranga.

Ariko yahakanye kugerageza abizi neza kunekera Iran, umwanzi ukomeye cyane wa Israel.

Nyuma yo gukatirwa igifungo ku wa kabiri, amagambo y’abanyamategeko be yasubiwemo n’ikinyamakuru the Times of Israel bagira bati:

"Si maneko kandi ibi si amahano yo kuneka".

Bongeyeho bati: "Ibi bijyanye n’umugabo wisanze yugarijwe n’umwenda [ideni] agatahura icyuho ku mutekano".

Amakuru avuga ko Goren yabwiye abakora iperereza ko yateganyaga gushuka abo ba ’hackers’ bakamuha amafaranga ariko ntagire amakuru n’amwe abaha.

Inyandiko ya mbere y’ibirego yatangajwe mu kwezi kwa cumi na kumwe mu 2021 yaregaga Goren gutera intambwe ya mbere akagera ku itsinda Black Shadow ku rubuga rwa Telegram.

Hari nyuma yuko asomye mu bitangazamakuru byo muri Israel amakuru ajyanye no kugerageza kw’iryo tsinda kwo kwinjira muri za mudasobwa.

BBC