Umwe mu bahataniye umwanya w’umukuru w’igihugu muri Repuburika ya Demokarasi ya Congo yatanze ikirego mu rukiko yamagana ibyavuye mu matora yatsinzwe n’umukuru w’igihugu usanzweho Felix Tshisekedi.

Komisiyo yigenga ishinzwe amatora, CENI,yemeje ko Tshisekedi yabonye amajwi arenga 73 kw’ijana,umukurikira, Moise Katumbi agira 18%.

Théodore Ngoy, wabaye uwa nyuma mu majwi na 0.02% niwe wajyanye ikirego cyo gusaba ko ibyavuye muri ayo matora biseswa.

Yatanze icyo kirego ku wa gatatu ku munota wa nyuma w’igihe cy’iminsi ibiri abari biyamamaje bari bafite kugira ngo batange ibirego ku byo batemera mu byavuye muri ayo matora.

Babiri baza inyuma ya Felix Tshisekedi mu majwi, Moise Katumbi na Martin Fayulu bo bavuze ko batazaregera urukiko kugira bange ivbyavuye muri ayo matora ariko basabye ko haba imyigaragambyo yo kuyamagana.

Ngoy, umunyamategeko akaba n’umupasiteri, yari yiyamamaje kandi mu 2018 hanyuma aratsindwa.

Yabwiye urubuga rwa radio y’Abaransa RFI ko ashaka ko ibyavuye muri ayo matora’’ biseswa.

Urukiko rufite iminsi irindwi yo kugira icyo rukora kuri icyo kirego. Urwo rukiko rushinzwe kurengera itegekonshinga byitezwe ko rwemeza ibyavuye mu matora ku wa 12 Mutarama ku ndangaminsi nshya yasubiwemo na CENI. Ubwa mbere hari kuba itariki 10.

Urukiko byitezwe ko ruzatangaza umwanzuro warwo ku wa 12 Mutarama.

Amatora rusange muri Congo yabaye ku wa 20 Ukuboza arangwa no gukererwa henshi ku biro by’amatora n’utundi tunenge twinshi tw’ikoranabuhanga.

BBC