Urukiko rw’ubujurire rwo mu Burundi rwashimangiye igifungo cy’imyaka 10 urukiko rwisumbuye rwakatiye umunyamakuru Floriane Irangabiye.

Iki gihano Irangabiye yari yagihawe n’urukiko rubanza muri Mutarama uyu mwaka. Mu bihano yari yahawe kandi harimo kwishyura amande angana n’amadolari 500.

Umunyamategeko wa Irangabiye, Eric Ntibandetse yabwiye AFP ko urukiko rutigeze ruha agaciro ingingo batanze basaba ko igihano umukiliya we yahawe cyakurwaho.

Irangabiye ari umwe mu bahungiye mu Rwanda nyuma y’imvururu zabaye mu Burundi mu 2015. Irangabiye yatashye mu gihugu cye umwaka ushize nyuma yo kumva amakuru ko bamwe mu batavuga rumwe na Leta batakanganye, bemerewe kugaruka mu gihugu.

Ni umwe mu banyamakuru bakoreraga radiyo yo kuri Internet itaravugaga rumwe n’ubutegetsi bwa Bujumbura.

Bivugwa ko yafashwe tariki 30 Kanama 2022, afatwa n’inzego z’ubutasi z’u Burundi. Yamaze iminsi umunani bitazwi aho aherereye mbere yo kugezwa mu butabera. Minisiteri y’Ubutabera mu Burundi yatangaje ko Irangabiye nta karita y’itangazamakuru afite nubwo we avuga ko ari umunyamakuru.