Umuryango w’abibumbye uravuga ko abaturage barenga kimwe cya kane cy’abatuye Republika ya Demokarasi ya Congo bugarijwe n’icyago cy’inzara.

Sponsored Ad

Imibare itangwa n’ishami ry’uyu muryango ryita ku biribwa FAO, yerekana ko abaturage bagera kuri miliyoni 25 bakeneye inkunga yihutirwa yo mu rwego rw’ibiribwa.

Uburasirazuba bw’iki gihugu ngo ni bwo bwugarijwe cyane kubera ko intambara zahagaritse ibikorwa by’ubuhinzi.

Icyegeranyo c’uyu muryango kivuga ko ibiciro bizamuka cyane ndetse n’umusaruro muto bishobora gutuma abatuye iki gihugu bazahara kurushaho.

Mu cyegeranyo, Ishami rya ONU ryita ku biribwa FAO rivuga ko Republika ya Demokarasi ya Congo ihanganye n’ibibazo by’intambara z’urudaca, ubujura n’ubwicanyi bwo mu mijyi byiyongeraho ibyorezo bitandukanye bituma iki gihugu gihora mu bihe by’akaga.

Kivuga ku burasirazuba bw’iki gihugu, icyegeranyo kigaragaza ko kubera ubushyamirane bw’amoko n’intambara abaturage bakomeje kuva mu byabo.

Uduce turimo inzara ikomeye ni uturimo imirwano n’ubushyamirane bituma abaturage batitabira ibikorwa byongera umusaruro.

Uturere tuvugwa ni nk’intara ya Ituri, Kivu zombi zo mu burasirazuba bw’igihugu ahabarizwa 80% by’abaturage bagera kuri Miliyoni 7 bakuwe mu byabo.

Ubusesenguzi bw’impuguke z’uyu muryango buvuga ko utu duce twugarijwe bikomeye n’ubuke bw’ibiribwa.

Muri rusange abaturage bakabakaba miliyoni 26 mu gihugu cyose ngo bugarijwe n’inzara kubera ahanini intambara zitarangira, ibiciro by’ibiribwa biri hejuru ndetse n’igiciro gihambaye cy’ubwikorezi bw’ibintu nkenerwa nk’ibiribwa.

Ibi bikiyongeraho ibyorezo birimo nk’icy’ubushita bw’inkende kimaze iminsi gica ibintu mu duce tumwe na tumwe tw’igihugu.

Ikibazo cy’ibiza nk’imyuzure na cyo kikaba cyaraje guhuhura ibintu byari bisanzwe bidahagaze neza.

Kuri ubu imiryango myinshi ngo ibona ibiribwa ari uko igiye kubishaka ku masoko kuko intambara zidatuma abahinze bajya gusarura n’abakora ibindi bikorwa nk’uburobyi bakaba batakibishobora.

Ukwiyambaza isoko kuri bose ndetse n’umusaruro wagabanutse cyane bikaba bituma ibiciro bya bike bibonetse bizamuka cyane.

Kuba ingabo z’umutwe wa ONU MONUSCO zaravuye muri tumwe mu duce nka Kivu y’amajyepfo na byo ngo byongereye impungenge zituma abaturage bakomeza guhunga kubera gutinya imitwe yitwaje intwaro.

Ku buryo busa n’impuruza, iki cyegeranyo kivuga ko intara za Tshopo, Tschuapa, Kivu ya ruguru n’iy’epfo, Maniema, Ituri na Maindombe zigaragaramo inzara isa n’itangiye kuba karande mu gihe cy’imyaka 20 ishize.