Mu irushanwa ry’inzoga nziza riba buri mwaka riteguwe n’ikigo Monde Selection, ryemeje ko inzoga yengwa n’umurundi John Chris Kavakure yatahukanye umudari wa zahabu w’inzoga ya mbere iryoshye cyane muri uyu mwaka.

Sponsored Ad

Iyo nzoga yitwa Red Flo Bio yahanganye n’ubundi bwoko bw’inzoga 3,100 zivuye mu bihugu 90 byo mu migabane itandukanye y’isi muri iri rushanwa ryabaga ku nshuro ya 60.

Inzoga nziza muri iryo rushanwa ziba zifite urugero rwo gukara rwa 7.5.

Irushanwa Monde Selection ni irya kompanyi yitwa International Quality Institute yo mu Bubiligi, ivuga ko ifite uburambe mu kureba no kumva neza ibikorwa bifite umwihariko yaba mu guteka, kwenga,ubuzima,n’ubwiza bw’imico kw’isi.

John Chris Kavakure umubiligi ufite inkomoko mu Burundi ashima uyu mudali kuko werekanye ko abanyafrika muri rusange n’Abarundi by’umwihariko bashoboye.

Yagize ati:"Kuba negukanye uwo mudari ndi Umurundi, uvuka mu Bwiza, biraha ingufu urundi rubyiruko ko mu bikorwa bakora, ejo hashobora kuboneka undi John Chris mu buhinzi, mu kudoda, mu korora."

Kavakure amaze gukora ubwoko burenga 20 bw’inzoga mu rwengero rwe rwa Les Brasseries de Flobecq riri mu Bubiligi, akaba ashobora gukora ama ’hectolitres’ 30.000 ku munsi.

John Chris avuga ko umwuga wo kwenga inzoga yawukundishijwe na nyirakuru.Ati “:"Nyogokuru ni we watumye nkunda kwenga inzoga kuko namubonaga arimo kwenga imbuto ngahita nkurikirana uko abigenza n’ibyo ashyiramo."

Ibyo byatumye agira ishyaka ryo kwiga ubuhanga bwo gukora inzoga ziryoshye muri kaminuza aho yaboneye impapuro mpamyabumenyi.

BBC