Ikigo cya Alef Aeronautics kimaze imyaka irenga 10 mu bushakashatsi ku modoka ziguruka, cyatangaje ko uyu mwaka gishobora gushyira hanze izi modoka, zigatangira gukoreshwa.

Sponsored Ad

Mu Ukwakira 2022, iki kigo cyari cyashyize hanze ubwoko bw’imodoka kiri kwitegura gushyira ku isoko, zizwi nka ’Model A’ zishobora gukora urugendo rwa kilometero 350 mu kirere.

Icyo gihe, abakiliya 440 bahise bagura izo modoka, ndetse amakuru akavuga ko abarenga 3400 bamaze kugaragaza ubushake bwo gutunga izi modoka, aho izi modoka zose ziramutse zigurishijwe, zaba zifite agaciro karenga miliyari 1$.

Mu itangazo iki kigo cyashyize hanze, cyavuze ko "Ibintu byose bigenze uko twabiteganyije, ntihabeho impinduka zidasanzwe, Alef irateganya gutangira gukora imodoka ziguruka mu mpera za 2025 cyangwa mu gihembwe cya mbere cya 2026."

Iyi modoka izaba ikoresha amashanyarazi 100%, ikaba ifite ubushobozi bwo kugendera ku muhanda usanzwe ndetse no kuguruka. Ifite umwihariko wo kuzakoresha ingufu nke z’amashanyarazi ugereranyije n’izindi modoka nazo zizwiho gukoresha ingufu nke, nk’iza Tesla.

Iki ni kimwe mu byatunguye abantu, hibazwa ku ikoranabuhanga rya batiri izakoresha, bamwe bagakeka ko ari ikoranabuhanga rishya, rikora neza kurushaho.

Gusa izi modoka zizajya zigurutswa mu bice bimwe na bimwe, aho zitemerewe kugurutswa mu bice bituyemo abantu benshi. Kuzitwara ntabwo bizajya bisaba uruhushya rwihariye.

Iyi modoka izagera ku isoko igura ibihumbi 300$ gusa ngo iki giciro kizagenda kigabanuka cyane ku buryo izagera ubwo ihenduka kurusha Toyota Corolla na Ford Focus, zimwe mu modoka zikunzwe cyane ku Isi kubera uburyo zihendutse.

Nyuma ya Model A, iki kigo kizatangira gukora ku bundi bwoko bw’imodoka ziguruka, Model Z, aho byitezwe ko zo zizaba zihendutse, zigura nibura ibihumbi 35$, uretse ko zishobora kuzagera ku isoko bwa mbere mu 2035.