Kuri uyu wa Kabiri, itariki 12 Ugushyingo 2024, Umushinjacyaha yasabiye Umunyamakuru Sandra Muhoza, igifungo cy’imyaka 12 no gutanga ihazabu y’amafaranga miliyoni imwe y’Amarundi, mu gihe abamwunganira bakomeje gutangaza ko ari umwere kandi basaba ko yarekurwa .

Sponsored Ad

Kuri uyu wa Kabiri, nibwo Sandra Muhoza yitabye imbere y’abacamanza mu Rukiko rwa Mukaza rwagati mu murwa Mukuru w’ubucuruzi w’U Burundi, Bujumbura. Yafashijwe n’umwe mu bamwunganira babiri, Maître Éric Ntibandetse.

Nyuma y’iburanisha, Maître Ntibandetse yatangarije abanyamakuru bo mu binyamakuru byaho igihano cyasabwe n’umushinjacyaha nk’uko tubikesha SOS Media Burundi.

Ati: “Umushinjacyaha yasabye urukiko ko rwakatira Sandra Muhoza igifungo cy’imyaka 12 y’igifungo n’ihazabu y’amafaranga miliyoni imwe y’Amarundi.”

Sandra Muhoza akurikiranweho icyaha cyo “kubangamira ubusugire bw’igihugu ndetse n’amacakubiri ashingiye ku moko”.

Maître Éric Ntibandetse yerekanye ko umukiriya we ari umwere kandi asaba ko yarekurwa “kubera ko nta bimenyetso byatanzwe n’umushinjacyaha”.