Urubanza rw’abasirikare b’ingabo za FARDC bagera kuri 60 bataye urugamba bagahunga bagakora ibikorwa by’ubugizi bwa nabi rwatangiye kuburanishwa ku wa mbere mu mujyi wa Butembo w’intara ya Kivu ya Ruguru muri DR Congo.

Sponsored Ad

Abaregwa, barimo abagore babiri na bo bashinjwa ubufatanyacyaha, bagejejwe imbere y’urukiko rwa gisirikare rwa Butembo ruri ahitwa i Musienene babanza gusomerwa imyirondoro yabo.

Seros Muyisa, umunyamakuru waho wari mu rukiko yabwiye BBC ati: "Abaregwa barimo gushinjwa guhunga umwanzi, kwiba, gufata ku ngufu, kwambura abantu ibyabo n’ibindi byaha baregwa gukorera muri Lubero-centre, Kimbulu na Musienene".

Abaregwa ntibaratangira kwiregura ku byo baregwa.

Umutwe wa M23 aba basirikare bahunze ubu ugenzura ibice by’intara ya Kivu ya Ruguru birimo n’umurwa mukuru wayo Goma, hamwe n’ibyo muri Kivu y’Epfo n’umurwa mukuru wayo Bukavu.

Ku rugamba muri Kivu y’Epfo na Kivu ya Ruguru kuva mu mpera z’icyumweru gishize hari agahenge hagati y’impande zirwana.

Muri Kivu y’Epfo abarwanyi ba M23 bivugwa ko bagumye ahitwa Sange hafi y’umujyi wa Uvira warenze Kamanyola, naho muri Kivu ya Ruguru bakaguma ahitwa Kitsambiro kuri kilometero 25 mbere yo kugera mu mujyi muto wa Lubero-Centre nawo uri kuri 40km uvuye mu mujyi wa Butembo.

Mbere gato y’ifatwa ry’umujyi wa Bukavu, abasirikare barenga 80 ba FARDC hamwe na Wazalendo bariho baburanishwa ku byaha nk’ibi aba Butembo ubu barimo kuregwa.

Urukiko rw’i Bukavu rwakatiye igihano cy’urupfu benshi muri abo baregwaga ibyaha birimo guhunga "umwanzi", ariko M23 isatiriye uwo mujyi abategetsi n’abasirikare bo muri uyu mujyi na bo bahise bahunga.

Abategetsi bavuga ko mu batorotse gereza ya Bukavu ubwo M23 yafataga uyu mujyi, harimo n’abo basirikare bari bakatiwe.

Abo basirikare bashinjwaga ibyaha birimo kwica no gusahura mu gace ka Kabare ko mu nkengero za Bukavu hamwe n’i Bukavu mu mujyi, nyuma yo guhunga urugamba mu duce twa Kavumu na Kalehe twa Kivu y’Epfo.