Perezida Joe Biden yatangaje ko icyorezo cya coronavirus kirangiye muri Amerika, nubwo umubare w’Abanyamerika bishwe na Covid ukomeje kuzamuka.

Sponsored Ad

Perezida Joe Biden yatangaje ko icyorezo cya coronavirus kirangiye muri Amerika, nubwo umubare w’Abanyamerika bishwe na Covid ukomeje kuzamuka.

Biden yavuze ko nubwo "tugifite ikibazo", uko ibintu bimeze birimo kuba byiza mu buryo bwihuse.

Imibare yerekana ko muri rusange Abanyamerika barenga 400 bapfa buri munsi bazize iyi virusi.

Mu cyumweru gishize, umukuru w’ishami ry’umuryango w’abibumbye ryita ku buzima (OMS/WHO) yavuze ko umusozo w’icyorezo urimo "kuboneka".

Mu kiganiro 60 Minutes cya televiziyo CBS cyatangajwe ku cyumweru, Biden yavuze ko Amerika ikirimo gukora "akazi kenshi" mu guhagarika iyi virusi.

Icyo kiganiro yagiranye na CBS, igice cyacyo cyafashwe amashusho ku ibaraza ry’ahamurikirwa imodoka hazwi nka Detroit Auto Show, aho Perezida agaragara akora ibimenyetso n’intoki yerekeza ku mbaga y’abantu.

Yagize ati: "Niba mubibona, nta muntu n’umwe wambaye agapfukamunwa.

Ariko abantu bo mu butegetsi bwe ku wa mbere babwiye ibitangazamakuru byo muri Amerika ko amagambo ye atarimo guca amarenga ko hari impinduka ku igenamigambi igiye kubaho.

Banavuze ko nta gahunda ihari yo gukuraho uburyo busanzwe buriho mu rwego rw’ubuvuzi bwo gufata Covid-19 nk’icyihutirwa gishyize inkeke ku buzima.

Mu kwezi kwa munani, abategetsi bo muri Amerika bongereye igihe cyo gufata Covid-19 nk’icyihutirwa gishyize inkeke ku buzima, gahunda iriho kuva mu kwezi kwa mbere mu 2020, bakigeza ku itariki ya 13 y’ukwezi kwa cumi uyu mwaka.

Kugeza ubu, bose hamwe Abanyamerika barenga miliyoni imwe ni bo bamaze gupfa bishwe na coronavirus.
BBC