Leta ya Uganda yafashe umwanzuro wo gufunga uturere tubiri tugeramiwe n’icyorezo cya Ebola, mu gihe icyo gihugu kirimo gukora uko gishoboye kugira ngo gihagarike iki cyorezo.
Utubari, amazu y’utubyiniro, insengero n’izindi nzo zo kwinezerezamo byafunzwe i Mubende na Kassanda bahana umupaka, kandi hashyizweho n’amategeko yo kutava mu rugo (couvre-feu/curfew).
Iyi ngingo ni ukwisubiraho k’umukuru w’igihugu cya Uganda wari uherutse kuvuga ko ingamba nk’izi zidakenewe.
Iki cyorezo kimaze guhitana (...)

Sponsored Ad

Leta ya Uganda yafashe umwanzuro wo gufunga uturere tubiri tugeramiwe n’icyorezo cya Ebola, mu gihe icyo gihugu kirimo gukora uko gishoboye kugira ngo gihagarike iki cyorezo.

Utubari, amazu y’utubyiniro, insengero n’izindi nzo zo kwinezerezamo byafunzwe i Mubende na Kassanda bahana umupaka, kandi hashyizweho n’amategeko yo kutava mu rugo (couvre-feu/curfew).

Iyi ngingo ni ukwisubiraho k’umukuru w’igihugu cya Uganda wari uherutse kuvuga ko ingamba nk’izi zidakenewe.

Iki cyorezo kimaze guhitana ubuzima bw’abantu 19 muri 58 bamaze kumenyekana ko banduye.

Gusa, imibare nyirizina y’abanduye n’abamaze gupfa ishobora kuba irenga aho.

Iki cyorezo cyatangiye mu ntangiriro z’ukwezi kwa cyenda i Mubende akarere kari ku birometero bisaga 80 uvuye ku murwa mukuru Kampala.

Mbere y’aha, Perezida Museveni yari yamaganye guma mu rugo, avuga ko Ebola atari icyorezo gica mu muyaga, ko rero idasaba ingamba nk’iza Covid-19.

Ariko nijoro ku wa gatandatu yahagaritse urujya n’uruza rwose mu turere twa Mubende na Kassanda mu minsi 21.

Avuga ariko ko amakamyo atwara ibintu azakomeza kwinjira akanasohoka muri utwo turere, ariko ko ibindi bikorwa byose byo gutwara abantu bigomba guhagarara.

Muri iryo jambo yacishije kuri TV,Perezida Museveni yagize ati: "Izi ni ingamba z’igihe gito kugira ngo duhagarike ikwirakwira rya Ebola.

"Dutegetswe gukorana n’abategetsi kugira ngo duhagarike iki cyorezo mu gihe gito gishoboka”.

Perezida Museveni yari yamaze gutegeka igipolisi gufunga umuntu uwo ari we wese uketsweho iki cyorezo ariko akanga kwishyira mu kato ndetse anahagarika ubuvuzi gakondo.

Umuntu wa mbere wishwe n’iki cyorezo n’umugabo w’imyaka 24 w’i Mubende. Abantu batandatu bo mu muryango we nabo barapfuye.

BBC