Afurika y’Epfo yemeje ko abandi basirikare bayo bane bapfiriye mu ntambara ikomeje kubera mu burasirazuba bwa Repubulika Iharanira Demokarasi ya Congo, bituma umubare w’abo imaze gupfusha kuva mu cyumweru gishize ugera kuri 13.

Sponsored Ad

Afurika y’Epfo yemeje ko abandi basirikare bayo bane bapfiriye mu ntambara ikomeje kubera mu burasirazuba bwa Repubulika Iharanira Demokarasi ya Congo, bituma umubare w’abo imaze gupfusha kuva mu cyumweru gishize ugera kuri 13.

Inkuru y’urupfu rw’aba basirikare yemejwe na SABC News, igitangazamakuru cya Leta ya Afurika y’Epfo.

Afurika y’Epfo iri mu bihugu bigize umuryango wa SADC biri mu ntambara yo mu burasirazuba bwa Congo, dore ko yahohereje ingabo zo guha umusada FARDC ihanganye n’inyeshyamba zo mu mutwe wa M23.

Mu mpera z’icyumweru gishize Igisirikare cy’iki gihugu cyari cyatangaje ko hari abasirikare bacyo icyenda bishwe, ubwo bari bahanganye na M23 hafi y’umujyi wa Sake wigaruriwe n’inyeshyamba.

Usibye abasirikare ba Afurika y’Epfo, Malawi ndetse na MONUSCO na bo batangaje ko batakarije abasirikare muri iyo mirwano.

Perezidansi ya Afurika y’Epfo ibinyujije ku rubuga rwayo rwa X, yatangaje ko ku wa Mbere Perezida Cyril Ramaphosa wa Afurika y’Epfo yahamagaye kuri Telefoni mugenzi we Paul Kagame w’u Rwanda, baganira ku ngingo zirimo urupfu rw’abo basirikare.

Yagize iti: “Perezida Cyril Ramaphosa yagiranye ikiganiro cyo kuri Telefoni na Perezida Paul Kagame w’u Rwanda, baganira ku biheruka kubera mu burasirazuba bwa RDC ndetse no ku kwiyongera kw’imirwano yaguyemo abasirikare bari mu butumwa bwa SAMIDRC.”

“Abakuru b’ibihugu bombi bemeranyije ku cyihutirwa gikenewe ngo imirwano ihagarare, ndetse no gusubukura ibiganiro by’amahoro bireba impande zose ziri mu mirwano.”

Perezida Ramaphosa yahamagaye Perezida Paul Kagame, mu gihe amashyaka atavuga rumwe n’ubutegetsi bwe akomeje kumwotsa igitutu amusaba gucyura ingabo za Afurika y’Epfo zikomeje gupfira muri RDC; bijyanye no kuba atumva icyo ziriya ngabo zagiye kurwanira.