Akanama k’umuryango w’Ubumwe bw’Uburayi kafatiye ibihano abantu umunani kubera imirwano yo mu burasirazuba bwa Repubulika ya Demokarasi ya Congo.
Ibi bihano kuri aba bantu umunani, birimo nko kubuzwa gukorera ingendo no gufatirirwa imitungo, bizatangira gukurikizwa ku itariki ya 23 y’uku kwezi kwa cumi na kabiri.
Mu bafatiwe ibihano harimo na Majoro Willy Ngoma, umuvugizi w’umutwe w’inyeshyamba wa M23 na Ruvugayimikore Protogène, uzwi cyane ku mazina nka Ruhinda, Gaby Ruhinda, Zorro Midende, EU (...)

Sponsored Ad

Akanama k’umuryango w’Ubumwe bw’Uburayi kafatiye ibihano abantu umunani kubera imirwano yo mu burasirazuba bwa Repubulika ya Demokarasi ya Congo.

Ibi bihano kuri aba bantu umunani, birimo nko kubuzwa gukorera ingendo no gufatirirwa imitungo, bizatangira gukurikizwa ku itariki ya 23 y’uku kwezi kwa cumi na kabiri.

Mu bafatiwe ibihano harimo na Majoro Willy Ngoma, umuvugizi w’umutwe w’inyeshyamba wa M23 na Ruvugayimikore Protogène, uzwi cyane ku mazina nka Ruhinda, Gaby Ruhinda, Zorro Midende, EU ivuga ko akuriye umutwe wa FDLR-FOCA, urwanya leta y’u Rwanda ukorera mu burasirazuba bwa DR Congo.

EU ivuga ko aba bombi kubera imirimo yabo y’ubuyobozi, umwe muri M23 naho undi muri FDLR-FOCA, bagira uruhare "mu gutegura, kuyobora cyangwa gukora ibikorwa bihonyora bikomeye uburenganzira bwa muntu muri RDC" hamwe no "guteza umutekano mucye" muri icyo gihugu.

Umuvugizi wa FDLR Cure Ngoma yabwiye BBC Gahuzamiryango ko uwo muntu uvugwa na EU atamuzi, ko rero nta cyo yavuga kuri ibyo bihano aka kanya.

Ati: "Ayo mazina ndumva ari mashyashya, biransaba [kubanza] kugenzura".

Yemereye BBC Gahuzamiryango kuyivugisha mu masaha ya nimugoroba kuri iyi ngingo.

BBC Gahuzamiryango dukesha iyi nkuru, yagerageje kuvugana na Major Willy Ngoma kuri ibi birego, ariko kugeza ubu ntibirashoboka.

Ku wa kane kandi, ubutumwa bwo kubungabunga amahoro muri DR Congo, MONUSCO, bwasohoye itangazo buvuga ko iperereza ry’ibanze ryakorewe hafi y’uduce twa Kishishe na Bambo muri Rutshuru rigaragaza ko abasivile bagera ku 131 bishwe na M23 muri utwo duce ikoresheje “amasasu n’intwaro gakondo”.

Mu itangazo M23 yasohoye nyuma yaho, yavuze ko "yumijwe" no kuba umuryango ukomeye nka ONU ukora "akazi nabi cyane", ivuga ko rero ihakanye ibiri muri iryo perereza ivuga ko ribogamiye kuri leta ya DR Congo n’imitwe yitwaje intwaro ifatanyije na yo.

M23 yasabye ko hakorwa amaperereza yigenga akozwe n’abantu b’inyangamugayo kandi badafite uruhande babogamiyeho.

Mbere, umutwe wa M23 na bwo wari wahakanye ubwicanyi bwa Kishishe, wavuze ko abishwe ari abarwanyi b’inyeshyamba zabateye muri ako gace bagenzura n’abasivile umunani, utanga amazina yabo mu itangazo uyu mutwe wasohoye ku cyumweru.

Abaturage b’abasivile barenga 300,000 bamaze guhunga bata ingo zabo kuva imirwano yakubura mu mpera y’ukwezi kwa gatatu uyu mwaka hagati ya M23 n’igisirikare cya DR Congo.

Abantu bafatiwe ibihano barimo na Koloneli Joseph Nganzo Olikwa, uzwi cyane ku izina rya Tipi Ziro Ziro, wo mu ngabo za DR Congo (FARDC).

Bitangazwa ko abasirikare akuriye bagabye ibitero ku basivile, birimo no gufata abagore ku ngufu, hagati y’ukwezi kwa gatandatu n’ukwezi kwa cumi na kabiri mu 2021.

Kuri uru rutonde hariho na Meddie Nkalubo, Umunya-Uganda uvugwa ko ari umutegetsi wo hejuru wo mu mutwe w’inyeshyamba wa ’Allied Democratic Forces’ (ADF).

Bivugwa ko yagize uruhare mu bikorwa bitandukanye bya ADF, birimo nko kwinjiza abantu muri uyu mutwe, gukora imbunda no kugirana imikoranire n’umutwe wiyita Leta ya Kisilamu (IS).

Ibihano byanafatiwe umucuruzi w’Umubiligi Alain Goetz, wahoze akuriye muri Uganda kompanyi itunganya zahabu.

Itangazo ry’akanama ka EU rivuga ko ku buyobozi bwe, kompanyi ’African Gold Refinery’ yaguze, itunganya, inagurisha zahabu ivuye mu birombe byo muri DR Congo bigenzurwa n’imitwe yitwaje intwaro.

Koloneli Olikwa, Nkalubo na Goetz nta cyo baratangaza ku mugaragaro kuri ibi bihano bafatiwe na EU.

Kuri uru rutonde rw’abafatiwe ibihano, hariho n’abandi bantu bo ku rwego rwo hejuru bivugwa bafite aho bahuriye n’imitwe yitwaje intwaro yo mu burasirazuba bwa DR Congo.

Kugeza ubu abantu 17 bose hamwe ni bo bamaze gufatirwa ibihano na EU kubera umutekano mucye mu burasirazuba bwa DR Congo.

BBC