Muri Sudani, abarwana batangiye agahenge k’amasaha 24. Ariko hari impungenge ko ataza kurangira batongeye kurasana.

Impande zombi ziyemeje guhagarika imirwano mu ijoro ryakeye mu mishyikirano barimo mu mujyi wa Jeddah muri Arabiya Sawudite, babifashijwemo n’iki gihugu na Leta zunze ubumwe z’Amerika nk’abahuza. Amasezerano yagombaga gutangira kubahirizwa mu gihugu hose guhera saa kumi n’ebyiri mu gitondo (kw’isaha y’i Khartoum).

Si ubwa mbere ingabo za leta ya Sudani n’umutwe witwara gisirikare, “Forces de Soutien Rapide” mu Gifaransa cyangwa “Rapid Support Forces” mu Cyongereza, bavuga ko bahagaritse kurwana ariko ntibimare akanya. Ubu nabwo impungenge ni zose ku bahuza. Ariko babwiye impande zombi ko bashobora kubivamo nibaramuka bananiwe kwifata.

Intambara imaze amezi abiri. Imaze guhitana abantu hafi 2,000. Yirukanye mu byabo abandi bagera kuri miliyoni ebyiri. 400,000 muri bo bambutse imipaka bajya mu buhungiro mu bihugu by’abaturanyi.