Abaturage bo muri Teritwari ya Nyiragongo mu ntara ya Kivu y’Amajyaruguru, Ku wa Gatatu bakoze imyigaragambyo bamagana inyeshyamba za Wazalendo.

Wazalendo ni ihuriro ry’imitwe itandukanye yo muri Repubulika Iharanira Demokarasi ya Congo Guverinoma y’iki gihugu yahurije hamwe, kugira ngo bafashe Ingabo zayo guhangana n’umutwe wa M23.

Kuva aba barwanyi bahawe intwaro n’igisirikare cya RDC cyakora bakunze kwibasira abaturage bo muri za Teritwari za Rutshuru, Masisi na Nyiragongo.

Abigaragambije Ku wa Gatatu bamaganaga ihohoterwa, ubujura, ubwicanyi ndetse no gutotezwa bakorerwa n’insoresore zo muri uriya mutwe.

Mu ndirimbo baririmbaga bumvikanishaga ubutumwa bugira buti: "Turarambiwe, turasaba umutekano wacu."

Hagati aho ku wa Mbere w’iki cyumweru sosiyete sivile yo muri Nyiragongo yasabye Guverinoma ya Repubulika Iharanira Demokarasi ya Congo gufatira ingamba zimwe mu nsoresore za Wazalendo zirirwa zirasagura amasasu nyamara nta mwanzi zihanganye na we.