Leta Zunze Ubumwe za Amerika igiye kohereza ubwato bubiri bunini bw’intambara buzwi nka USS Bataan mu Burasirazuba bwo hagati hamwe n’abasirikare babarirwa mu bihumbi barwanira mu mazi mu gukaza umutekano muri ako gace nyuma y’aho Ingabo za Iran zitangaje ko zishobora kugaba ibitero mu kigobe cya Persique.

Ubwo bwato bubiri bw’intambara burimo ubwitwa USS Bataan (LHD-5) na USS Carter Hall (LSD-50). Amerika izabwohereza hamwe n’abasirikare bo muri unite ya 26 y’umutwe udasanzwe urwanira mu mazi.

Uku kohereza ingabo byatangajwe n’Umunyamabanga wa Amerika ushinzwe Ingabo, Lloyd Austin.

Izi ngabo zigiye koherezwa nyuma y’aho ku wa 5 Nyakanga, ubwato bwa Iran, IRINS Bayandor, bwarashe ku bundi butwara ibikomoka kuri peteroli bwari mu nyanja mu nkengero za Oman.

Bivugwa ko Iran yarashe kuri ubwo bwato ishaka kubutwara. Ku rundi ruhande, hari amakuru ko kuva mu 2020, Iran yashatse gutwara ubwato 20.

Magingo aya, Amerika ifite ubwato karundura bw’intambara butatu bwose buri muri ako gace. Harimo ubwitwa USS Thomas Hudner (DDG-116), USS Paul Hamilton (DDG-60) na USS McFaul (DDG-74).