Umuyobozi w’umutwe wa Boko Haram wayogoje igihugu cya Nigeria witwa Abubakar Shekau,biravugwa ko yiturikirijeho igisasu arapfa ubwo yari asatiriwe cyane n’abanzi bo mu mutwe bahanganye muri kiriya gihugu cyo mu burengerazuba bwa Afurika.

Mu ijwi ryashyikirijwe ibinyamakuru, umutwe wa Islamic State West Africa Province (ISWAP) uvuga ko Shekau yapfuye yiturikirijeko ikibombe nyuma y’intambara hagati y’iyo mitwe yombi.

Shekau byavuzwe ko yapfuye mu kwezi gushize,ndetse ko ariwe wiyishe.

Yaba Boko Haram cyangwa Leta ya Nigeria nta ruhande na rumwe ruremeza urupfu rwe.

Muri iri jwi bitazwi igihe ryafatiwe, bikekwa ko ari iry’umukuru wa ISWAP, Abu Musab al-Barnawi uvuga ko Shekau "yiyahuye yiturikirijeho igisasu".

Abarwanyi ba ISWAP baramuhize bikomeye banamuha amahirwe yo kwisubiraho akifatanya nabo, nk’uko bivugwa na al-Barnawi.

Ubwo amakuru y’urupfu rwa Shekau yatangiraga gukwirakwizwa mu kwezi gushize, igisirikare cya Nigeria cyavuze ko kiri gukora iperereza.

Umuvugizi w’igisirikare Général de Brigade Mohammed Yerima yabwiye BBC icyo gihe ko igisirikare cyarimo kureba ibyari byabaye, ariko ko nta tangazo cyari gusohora kugeza kibonye ibyemezo bifatika.

Umunyamakuru wegereye inzego zishinzwe umutekano yavuze ko Shekau yapfuye igihe ISWAP yateraga ibirindiro bya Boko Haram mu kibaya cya Sambisa muri Nigeria.

Icyakora, uyu mukuru wa Boko Haram amaze kubikwa ko yapfuye incuro zitari nke ariko akongera kugaragara ari muzima.

Abubakar Shekau yahawe kuyobora Boko Haram nyuma y’aho uwayitangije apfiriye muri gereza ya polisi muri 2009.

Shekau yashoboye kubaka uyu mutwe kuva hasi kugeza ubaye umutwe ukora ubwicanyi bukomeye.

Kuva mu 2014, yatanguye kwigarurira imijyi kugira ngo ashinge leta ya ki-Islam igendera ku itegeko rya Islam, Sharia.Shekau, azwi ko yari mu myaka 40 ndetse yigeze gutangaza ko aryoherwa no kwica nkuko bimera iyo ari kurya inyama.

BBC