Abantu umunani baraye bishwe mu gitero cy’abajura bitwaje intwaro mu ntara ya Muramvya, nk’uko byatangajwe na Minisitiri w’Umutekano mu gihugu n’iterambere.Buvuga ko hari n’abakomeretse n’ibintu byibwe.

Amakuru yakwirakwijwe ku mbuga nkoranyambaga avuga ko hafi y’umurwa mukuru wa Muramvya (Muramvya) hari abantu bitwaje imbunda bateze imodoka 4 bakazirasa.

Byabereye ku birometero bine uvuye ku mujyi wa Muramvya aho nk’igice cy’isaha 19h35 ku cyumweru ako gatsiko kategereye imodoka 4 zajyaga i Bujumbura, nk’uko iyi Minisiteri ibitangaza.

Amakuru avugwa ku mbuga nkoranyambaga, harimo ifoto y’uvugwa ko yishwe,wari umusikare mu gisikirakare cy’Uburundi ufite ipeti rya Koloneri.

Harimo kandi n’amajwi y’umugore avuga ko umugabo we n’umwana we bishwe mu gihe we n’abandi bana be bandi babiri bakomeretse.

Gusa imyirondoro y’abishwe ntiyatangajwe n’iyi minisiteri ishinzwe umutekano.

Mu majwi yakwirakwijwe ku mbuga nkoranyambaga, bamwe mu bari aho ubu bwicanyi bwabereye bavuga ko hari zimwe muri izi modoka zatwitswe.

Iyi Minisiteri yatangaje ko iperereza ryatangiye kugira ngo abakoze aya mahano bafatwe.

Ibi bibaye nta kwezi kurashira habaye ubundi bwicanyi nk’ubu muri komine Rusaka y’intara ya Mwaro ihana imbibi na Muramvya, aho abantu barindwi bishwe n’abantu batamenyekanye.

BBC