Mu butumwa yashyize kuri konti ye ya twitter kuri uyu wa Mbere, Martin Fayulu utavuga rumwe n’ubutegetsi muri Repubulika ya Demokarasi ya Congo, yagaragaje ko ahangayikishijwe n’ihungabana ry’umutekano rikomeje mu burasirazuba bw’igihugu, aho uduce dutandukanye dukomeje kwigarurirwa na M23.

Sponsored Ad

Fayulu yabajije Perezida Félix Tshisekedi icyo yiteguye gukora byihuse akagaruza imijyi avuga ko igera ku 120 imaze kwigarurirwa kugeza ubu.

Yabajije ibibazo ku buyobozi buriho bugaragara ko budashobora kurengera ubusugire bw’igihugu kandi abaza niba Itegeko Nshinga ribuza perezida kubwiza ukuri Abanyekongo ku ngamba zafatwa zo kugarura umutekano. Kuri uyu wa Mbere, itariki ya 3 Ugushyingo, M23 yigaruriye undi mujyi witwa Kamandi Gîte, uherereye muri Teritwari ya Lubero, mu birometero birenga 130 mu majyaruguru ya Goma.

Bivugwa ko M23 yagabye igitero ku birindiro by’inyeshyamba za Wazalendo, ibyo bikaba bigaragaza iterambere rishya ry’inyeshyamba ku rugamba rw’amajyaruguru, nyuma y’imirwano yabereye ku yindi mirongo, cyane cyane i Walikale. Ifatwa rya Kamandi Gîte ryafunguye inzira igana mu Mujyi wa Beni kandi itanga uburyo bwo kugera ku Kiyaga cya Edward, ku mupaka na Uganda, bityo bituma impungenge ziyongera ku mitwe yitwaje intwaro ihakorera.

N’ubwo ibintu byari bikomeye, Igisirikare cya Congo cyo kivuga ko gikomeje gukurikiza agahenge, cyatangaje ko gitegereje amabwiriza y’abayobozi bacyo kugira ngo bagabe igitero cyo kurwanya inyeshyambaza M23. Iki kibazo cyakuruye icyifuzo cy’imiryango itegamiye kuri leta, yagaragaje ko ari ngombwa kurinda no kurengera igihugu mu gihe iki kibazo kigenda cyiyongera.