Umugaba Mukuru w’Ingabo za Uganda, Gen. Muhoozi Kainerugaba, yabonanye na mugenzi we Gen. Christian Tshiwewe Songesa, Umugaba Mukuru w’Ingabo za Repubulika ya Demokarasi ya Congo (FARDC), mu rwego rwo gushimangira ubufatanye mu guhangana n’ibibazo by’ihungabanya ry’umutekano rusange .

Sponsored Ad

Iyi nama yabereye ku cyicaro gikuru cy’ubutasi n’umutekano i Mbuya, i Kampala, kuri uyu wa Kane, itariki 31 Ukwakira 2024, ikurikira uruzinduko ruherutse rw’Umugaba Mukuru w’Ingabo za Sudani y’Epfo, Gen. Santino Deng Wol.

Gen. Kainerugaba, akaba n’umujyanama mukuru wa perezida ku bijyanye n’ibikorwa bidasanzwe (Special Operations), Mbere yabanje kugirana ibiganiro na bagenzi be bo mu karere, barimo uw’u Rwanda, Ethiopia, Mali, Mozambike, na Misiri.

Umuyobozi w’ingabo za Repubulika ya Demokarasi ya Congo yari aherekejwe n’abayobozi bakuru ba FARDC.

Intumwa za Uganda zari zirimo Komanda w’ingabo zirwanira ku butaka, Lt. Gen. Kayanja Muhanga, Umuyobozi w’ingabo zirwanira mu kirere, Lt. Gen. Charles Okidi, Umuyobozi w’umutwe ushinzwe kurinda perezida (SFC) Maj. Gen. BD Mugisha, n’abandi.

Ikigaragara ni uko iyi nama ibaye nyuma y’uruzinduko rwa Perezida wa DRC, Felix Tshisekedi wabonanye na Perezida Yoweri Museveni i Entebbe kuwa Gatatu, itariki 30 Ukwakira 2024.

Ingabo za UPDF na FARDC zagiye zikora ibikorwa bihuriweho byo kurwanya iterabwoba rya ADF mu burasirazuba bwa DRC.

Uganda na Repubulika ya Demokarasi ya Congo (DRC) byongereye ubufatanye mu nzego nyinshi hagamijwe guteza imbere umutekano mu karere no kuzamurana mu bukungu.

Kubaka ibikorwa remezo bihuriweho, cyane cyane imihanda, hagati ya Uganda na DRC bigamije kunoza ubucuruzi n’umutekano.

Iyi mihanda yorohereza urujya n’uruza rwambukiranya imipaka, bigatuma byihuta kohereza ingabo mu rwego rwo guhangana n’ihungabana ry’umutekano riterwa n’umutwe wa ADF washinzwe n’Abagande.