Minisiteri y’Ubuzima mu butegetsi bwa Hamas muri Gaza ivuga ko abantu nibura 241 bishwe mu masaha 24 ashize, mu gihe ibitero bya gisirikare bya Israel bikomeje muri ako gace.

Umukuru w’ubutegetsi bwa Palestina Mahmoud Abbas avuga ko iyi ntambara ari “icyaha cy’agahomamnwa” ku baturage be.

Umukuru w’igisirikare cya Israel Herzi Halevi avuga ko intambara ihuza igihugu cye n’umutwe wa Hamas izakomeza mu "mezi yandi atari make".

Israel ivuga ko ejo ku wa kabiri honyine yateye ibice birenga 100, mu gihe hari amakuru avuga ko ibitero byo ku butaka byibanze mu karere ko hagati ka Gaza.

Ibiturika bikomeye byumvikanye ku mupaka Gaza ihana na Israel mu masaha y’igitondo cyo kuri uyu wa gatatu.

Minisiteri y’Ubuzima muri Gaza itangaza kandi ko abantu 382 bakomerekeye muri iki gihe cy’amasaha 24.

Nk’uko iyi Minisiteri ibivuga, abanya-Palestina nibura 20.915 bamaze kwicwa - abenshi muri bo bakaba ari abagore n’abana - mu gihe iyi ntambara imaze.

Amakuru atangwa n’impande zihanganye ntarashobora guhinyuzwa n’uruhande rwigenga.

Iyi ntambara yatangiye ku wa 07 Ukakira nyuma y’ibitero bya Hamas byahitanye abanya Israel. Abantu basaga 1200, cyane cyane abasivile, barishwe. Abagera kuri 240 nabo bashimutirwa muri Gaza, bake muri bo bakaba baramaze kurekurwa.

BBC