Igice cy’amajyarugu cya Gaza cyaraye kirashwe bikomeye ku buryo butari bwarigeze bubaho.

Umunyamakuru wa BBC ari mu mujyi wa Khan Younis muri Gaza, Rushdi Abualouf, avuga ko uburasirazuba bwa Gaza bwateweho ibibombe ku rugero “tutari twigera tubona”.

Umuriro mwinshi cyane wabonekaga mu kirere – bikaboneka ko Israel yarimo ikoresha ubwoko butandukanye bw’amabombe.

Avuga ko hari ubwoba hose, no mu mujyi wa Khan Younis, aho amabombe atari menshi,mu gihe abaturage barimo kugerageza guhamagara incuti zabo mu tundi turere kugira ngo bumve ko ari bazima, ariko amatelefone yacitse. Avuga ko ari akajagari gusa.

Israel ivuga ko yarashe ibirindiro 150 byo mu kuzimu za Hamas ikoresheje indege 100 maze mu bo yishe hakabamo umukuru w’abaparakomando ba Hamas uri mu bagabye ibitero byo ku itariki 07/10/23.

Ibitero bya Hamas kuri Israel byo ku itariki 07/10/23 byishe abantu 1400 itwara bunyago abantu 229.

Jenerali de Brigade Gilad Keinan uyoboye igice cy’igisirikare cya Israel kirwanira mu kirere avuga ko "indege z’intambara zigera ku ijana” zakoreshejwe mu bitero byo mu kirere byasenye ibi bibanza bya Hamas bigera ku 150.

Igisirikare cya Isiraheli cyanditse ubutumwa kuri X yahoze izwi nka Twitter, kiti: "Muri iri joro, indege z’intambara za IDF [igisirikare cya Israel] zishe Asem Abu Rakaba, umukuru w’igisata cya Hamas kirwanira mu kirere.

Abu Rakaba yari ashinzwe indege zitagira abapilote za Hamas, amadrone, utudege dukoresha imitaka, kwivuna no kuneka ibitero byo mu kirere.

Yagize uruhare mu gutegura ubwicanyi bwo ku wa 07 Ukwakira yongera gushyiraho abakoze ibitero by’iterabwoba binjiye muri Israel bakoresheje utudege dukoresha imitaka, kandi ni we wateguye ibitero by’amadrone ku birindiro bya IDF”.

Umuvugizi w’Igisirikare cya Israel (IDF) avuga ko intego ari ukubohoza abafashwe bunyago bagatahanwa muri Israel

Kugeza ubu Abanyapalestine 7000 bamaze kwicwa na Israel mu bitero byo kwihorera, nk’uko bitangazwa na Minisiteri y’Ubuzima yo muri guverinoma ya Hamas

(BBC)