Amakuru aturuka muri Gabon aravuga ko Perezida Ali Bongo Ondimba afungishijwe ijisho n’abasirikare bamukuye ku butegetsi.

Byinshi mu binyamakuru biravuga ko Noureddin Valentin Bongo, Umuhungu wa Perezida Ali bongo wahiritswe Ku butegetsi n’abasirikare , yafashwe n’abasirikare.

Valentin Bongo akaba ashinjwa n’abo basirikare icyaha cyo guhemukira igihugu.

Biravurwa ko hari n’abandi abategetsi bakuruyafashwe harimo umukuru w’ishyaka riri Ku butegetsi hamwe n’umuvugizi wa Perezida Ali bongo, n’abandi bataramenyekana.

Ikindi, kivugwa nuko abasirikare muri rusange batigeze basubiranamo kubera uruhande rw’uwo bashyigikiye ahubwo bumvikanye ku mugambi wo guhirika Perezida Ali Bongo.

Itsinda ry’abasirikare bakuru ryaramutse rijya kuri televiziyo y’igihugu muri Gabon kuvuga ko bafashe ubutegetsi kubera ko ibyavuye mu matora yo mu cyumweru gishize bitizewe.

Abasirikare 12 bagaragaye kuri televiziyo batangaza ko baburijemo ibyavuye mu matora kandi ko basheshe "inzego zose za repubulika".

Bwana Bongo yari yagize amajwi 64.27 % mu matora yabaye kuwa Gatandatu,ugereranyije na 30.77% yahawe uwo bari bahanganye cyane, Albert Ondo Ossa.

Guhirikwa kwa Ali Bongo kwaba gusoje imyaka 53 umuryango wa Bongo umaze ku butegetsi muri Gabon, yahoze ikolonizwa n’Ubufaransa.

Bongo, w’imyaka 64, yageze ku butegetsi ubwo se Omar yapfaga mu 2009.

Mu 2018, yagize uburwayi bw’iturika ry’imitsi yo mu bwonko (buzwi nka stroke), butuma amara hafi umwaka atari mu mirimo ye, bamwe basaba ko yegura.