Ku wa gatatu, tariki ya 23 Kanama, Ingabo z’igihugu cya Mozambique (FADM) zavuze ko muri iki cyumweru bishe abayobozi babiri b’umutwe w’iterabwoba ufitanye isano n’intagondwa za kisilamu [IS] ukorera mu majyaruguru y’intara ya Cabo Delgado.

Abayobozi bombi b’inyeshyamba bishwe ni Abu Kital, umuyobozi ushinzwe ibikorwa by’umutwe wa Ahlu-Sunnah wal Jama’a (ASWJ) na Ali Mahando, “kimwe na Abu Kital, bari bafite imyanya ikomeye muri uyu mutwe w’iterabwoba,nk’uko byatangajwe na FADM mu bitangazamakuru bya Mozambike.

Iri tangazo rivuga ko abo bayobozi b’umutwe w’iterabwoba bishwe “bitewe n’ibikorwa bikomeje gukorwa byo kurwanya ibikorwa by’iterabwoba” i Cabo Delgado ku bufatanye n’ingabo z’inshuti.

Ingabo za Mozambike, Ingabo z’u Rwanda (RDF) n’Ingabo z’umuryango w’ibihugu byo mu majyepfo y’Afurika (SADC) zifite ibikorwa bya gisirikare bihuriweho muri Cabo Delgado, yari yarahungabanijwe n’imitwe ya kisilamu kuva mu 2017, igahitana abasivili barenga 4000.

Muri Nyakanga 2021, u Rwanda rwohereje ingabo muri Cabo Delgado bisabwe na guverinoma ya Mozambike.

Kuva ubwo zasenye ibirindiro by’inyeshyamba mu turere twa Mocimboa da Praia, Palma na Macomia.

FADM yagize iti "Ingabo za Mozambike zikomeje kugira uruhare mu kurinda umutekano wa Mozambike n’abanya Mozambike. Icyakora, kuri ubu, barimo gukusanya amakuru menshi yerekeye izindi mitwe n’abandi banyamuryango, bizashyirwa ahagaragara mu gihe gikwiye ”.