Abantu nibura 11 bishwe, abandi batari bake barakomereka mu gitero cy’ibibombe cyakozwe n’ingabo z’Uburusiya ku nyubako y’iguriro (supermarket) mu mujyi wa Kharkiv uri mu majyaruguru ya Ukraine, nk’uko bivugwa n’abategetsi.

Sponsored Ad

Perezida Volodymyr Zelensky wa Ukraine avuga ko abantu barenga 200 ari bo bashobora kuba bari muri iryo guriro nijoro.

Kuri iki cyumweru,umuyobozi wa Kharkiv, Oleh Syniehubov yatangaje ko umubare w’abapfuye wazamutse ukagera ku bantu 11.

Mbere y’aho, hashize akanya gato iki gitero kibaye, yari yatangaje ko abantu batandatu "bapfuye", abandi 40 barakomereka, 16 nabo baburirwa irengero.

Umukuru w’Umujyi wa Kharkiv, Ihor Terekhov avuga ati: "Abantu benshi ntibazwi irengero ryabo. Iki ni igitero cy’iterabwoba ryeruye".

Perezida Zelensky yongerako ati: "Iki gitero kuri Kharkiv ni ikindi kimenyetso cy’ubusazi bw’Abarusiya.

"Abasazi nka [Perezida Vladimir] Putin bonyine ni bo bashobora kwica no guturitsa abantu nk’uku".

Igitero cya kabiri hagati muri Kharkiv mu masaha ya nijoro ku wa gatandatu cyakomerekeje abantu umunani, nk’uko bivugwa na Terekhov.

Zelensky ashimangira ko Ukraine ikeneye uburyo bwo kwirwanaho kandi ko ikeneye intwaro yemerewe n’incuti zayo z’Uburengerazuba mu kurwanya ibitero byo mu kirere.

BBC