Minisitiri w’intebe wa Israel Benjamin Netanyahu yavuze ko buri muntu wese wo muri Hamas ari "umupfu", nyuma y’inama ya mbere ya guverinoma y’ibihe bidasanzwe y’iki gihugu.

Ari kumwe na Benny Gantz, wo mu batavuga rumwe n’ubutegetsi, Netanyahu yavuze ko ubu ari "igihe cy’intambara"

Mbere yaho ku wa gatatu, Netanyahu na Gantz bemeye gushyira ku ruhande ubucyeba bukomeye bwabo bwo muri politiki bwari bwarafashe indi ntera bukavamo imyigaragambyo mu gihugu hose.

Ku wa gatandatu w’icyumweru gishize, na bwo Israel yatewe itunguwe ipfusha abantu 1200 barimo abishwe baciwe imitwe. Igitero cyakozwe n’umutwe wo muri Gaza witwa Hamas.

Mu kwihorera, Israel imaze kwica abantu 1100 ku butaka bwa Gaza n’ubwo intambara yeruye yo ku butaka itaratangira.

Ubu ingabo 300.000 za Israel ziri ku marembo ya Gaza zambariye urugamba, zitegereje ibwiriza rya nyuma ngo zambuke zitere aka gace ka km 41 z’uburebure na km 10 z’ubugari, kagaturwa na miliyoni 2,3 zabaturage.

Mu 1973 ku munsi mukuru wa Yom Kippur, Syria na Misiri byapimanyije abayisiraheli bari mu birori bigaba igitero simusiga kishe ingabo 2656 z’Abayahudi. Muri iyo ntambara Abarabu 18000 barahatikiriye.

Aka gace Israel yagafungiye umuriro, amazi, ibiribwa n’imiti. N’ubusanzwe 80% by’abaturage bako bari batunzwe na UN. Miliyoni y’abaturage bayo ibeshwaho umunsi ku munsi n’imfashanyo y’ibiribwa.