Umudepite wo muri Kenya ari guhigwa nyuma y’uko ashinjwa kurasa akica icyegera cy’uwo bahanganye mu matora mu burengerazuba bwa Kenya.
Ababibonye bavuga ko Didmus Barasa, umudepite w’agace kitwa Kimilili, yarashe uwo mugabo mu mutwe nyuma y’ubushyamirane ku biro by’itora mu ntara ya Bungoma.
Polisi yatangiye guhiga uyu mudepite urimo guhatanira manda ya kabiri mu matora y’uyu mwaka. Yahawe amasaha 24 yo kwishyikiriza abarimo gukora iperereza kuri urwo rupfu.
Abaturage muri Kenya ubu bategereje (...)

Sponsored Ad

Umudepite wo muri Kenya ari guhigwa nyuma y’uko ashinjwa kurasa akica icyegera cy’uwo bahanganye mu matora mu burengerazuba bwa Kenya.

Ababibonye bavuga ko Didmus Barasa, umudepite w’agace kitwa Kimilili, yarashe uwo mugabo mu mutwe nyuma y’ubushyamirane ku biro by’itora mu ntara ya Bungoma.

Polisi yatangiye guhiga uyu mudepite urimo guhatanira manda ya kabiri mu matora y’uyu mwaka. Yahawe amasaha 24 yo kwishyikiriza abarimo gukora iperereza kuri urwo rupfu.

Abaturage muri Kenya ubu bategereje kumenya ibyavuye mu matora, mu gihe amajwi arimo kubarwa ku biro by’amatora bibarirwa mu bihumbi za mirongo biri mu gihugu.

Muri rusange mu gihugu hari ituze muri iki gihe bategereje ibiva mu matora.

Amatora yo mu 2007 aracyahanze Kenya, aho nyuma yo gutangaza ibyayavuyemo imvururu zamaze ibyumweru hagapfa abantu 1,200, abagera ku 600,000 bagahunga ingo zabo.

Didmus Barasa uri guhigwa ntabwo ari mushya mu nkuru nk’izi. Umwaka ushize, yarafunzwe aregwa gukubita umunyamuziki wo muri aka gace.

Mbere yabaye umusirikare.

Baba Vs Hustler

Aya matora aragaragara nk’irushanwa rikomeye ry’abakandida babiri, Raila Odinga w’imyaka 77 na William Ruto w’imyaka 55.

Odinga wabaye igihe kinini mu batavuga rumwe n’ubutegetsi, abamushyigikiye bamuhimba “Baba” (Data), ari kwiyamamariza uyu mwanya ku nshuro ya gatanu.

Ruto, usanzwe ari visi perezida, yagerageje kwiyegereza abanya Kenya basanzwe yiyita “hustler”, ni inshuro ya mbere yiyamamaje kuri uyu mwanya.

Ugenekereje mu Kinyarwanda, ’hustler’ bivuze umuntu w’amikoro aciriritse ukora ubushabitsi butandukanye ashakisha imibereho.

Abandi bakandida babiri – David Mwaure Waihiga na George Wajackoyah – nabo bari mu ihiganwa.

Gutsinda ku cyiciro cya mbere bisaba umukandida:

Hejuru ya 1/2 cy’amajwi yose y’abatoye mu gihugu

Nibura 25% by’amajwi mu ntara nibura 24 kuri 47 z’igihugu

Nyuma yo kubara amajwi ku biro by’itora, ababishinzwe bafata ifoto y’ibyayavuyemo bakayohereza ku biro by’itora by’akarere birimo, n’ahari kubarirwa amajwi ku rwego rw’igihugu.

Kugira ngo habemo umucyo, itangazamakuru, amashyaka ya politike hamwe n’amatsinda ya sosiyete sivile basabwe na bo kubara ibiva ku biro by’amatora bigera ku 40,000 biri mu gihugu.

Gusa komisiyo y’amatora yonyine ni yo yemerewe gutangaza uwatsinze itora rya perezida nyuma yo kugenzura amajwi yose yoherejwe ku biro bibara amatora yo mu gihugu hose.

Iyi komisiyo igomba gutangaza uwatsinze bitarenze iminsi irindwi.

BBC